Rûsya berpirsyariya xwe ya têkildarî bûyerên li Qerebaxê red dike

Berdevkê Kremlîn Dmîtrî Peskov daxuyaniyek da çapemeniyê û got: “Em li dijî wê yekê ne ku aliyê rûs û hêza aştiyê ya Rûsyayê ku li Qerebaxê qehremantî raber kir, berpirsyar bên dîtin.”

Peskov red kir ku kêmahî çêbûne û got: “Ermenistan hevalbendê me ye, hîn jî hikumet û gelê wê nêzî me ne."

Peskov got ku diyaloga di navbera Moskova û Erîvanê de di astên dîplomatîk ên cur be cur de ye û bi taybetî di van demên zehmet de dewam dike.

Berdevkê Pûtîn diyar kir ku ew ê wezîfeyên xwe bi cih bînin ku di serî rêz ji mafên gelê Qerebaxê re were nîşakirin.

Serokwezîrê Ermenistanê Nîkol Paşinyan roja Yekşemê daxuyaniyek da û destnîşan kir ku tifaqên welatê wî yên heyî, bê bandor in. Paşinyan got: “Ermenistanê ti carî dest ji berpirsyariyên xwe bernedaye yan jî xiyanet li mutefikên xwe nekiriye.”

Ev demek e Ermenistanê rexneyên xwe yên li ser Moskovayê zêde kiriye. Bi taybetî jî têkildarî krîza Qerebaxê rexneyên cidî hene ku hêza aştiyê ya Rûsyayê ev rolê xwe baş ne lîstiye.