Li Enqere û Îzmîrê êrîş li buroyên Partiya Çepên Kesk hatin kirin

Bi destpêkirina pêvajoya hilbijartinê re li dijî Partiya Çepên Kesk êrîş jî ketin dewrê. Li Enqere û Îzmîrê, ji aliyê kes ango kesên nasnameya wan nediyar ve êrîş li buroyên hilbijartinê yên Partiya Çepên Kesk hat kirin. Li Enqerê, li dijî buroya hilbijartinê ya Partiya Çepên Kesk a li navçeya Mamakê êrîş hat kirin.

Li gorî agahiyên ku rayedarên buroyê dane Ajansa Mezopotamya (MA), alên Partiya Çepên Kesk hatine daxistin û li hemberî buroyê alên tirk hatine daleqandin.

Li aliyê din li Îzmîrê jî li dijî buroya hilbijartinê ya Partiya Çepên Kesk a li navçeya Menemenê êrîş pêk hat. Du êrîşkaran dîmenên dema êrîşê li ser hesabên xwe yên medya sanal parve kirin. Bi hinceta ku temenê wan biçûk e rayedarên Partiya Çepên Kesk giliya êrîşkaran nekirin.