Prosesê Aştîye de trolkarî û manîpulasyon

Sey ke yeno zanayîşî destpêkerdişê prosesê aştî dir hêvîya şarê ma hetê peynîamayîşê şer û pêrodayîşan de zêdyaya. Nê awayî ra semedê verdewamkerdişê prosesî, semedê werêamyayîş û aştîyêka bi rûmet e virazyo çi keweno milê înan ser bi ca ano. Eke ma raştî vacê, pêşeng û rayberê ma zî, şarê ma zî çi ray hetkarê pêkewtiş û şeran nêbîyo, têkoşîna şarê kurdî hemverê heqê şaran, hemverê nasname û ziwanê şaran, hemverê erd û warê şaran nêbîyo. 

Têkoşîna înan hemverê qedexeyê ke serê nasname û ziwanê înan yenê kerdişî bîyo. Lazim o bêro zanayîşî ke heqê her merdimî esto ke wayîr ro nasname, ziwan, erd û warê xo vecîyo û hemverê qedexeyan û zordestîya serdestan vecîyo. 

Yeno zanayîşî ke tercîho verên ê rayber û pêşenganê kurdan her gamî werêamyayîş û aştî bîyo la, her hewe zî no waştişê înan hetê serdestan ra bi şer û zordestîye ameyo cewabkerdişî. Helbet gere ma nê zî bivînê ke reya yewin a ke wextêke wina derg her di hetan ra zî şer ameyo vindarnayîşî û hêvîya şaran a werêamyayîş û aştîye zêdyaya.

Şarê kurdî nê prosesî de gamê ke lazimê eştê û erzenê. Çi cuyînê xo yê komelkî û pêroyîye de beno, çi medyaya komelî û alema ferazî de beno xeta xo waştişê aştî ra nêvecîyayo û semedê aştîya mîyanberê şaran virazyo têgeyrayo. La çi heyf ke hema vace dimayo ke prosesê aştî ame destpêkerdişî ra tepya gurûhêke trolan ke belî yo ke hetê pergala serdeste ra yenê fînansekerdişî medyaya komelî de vecîyayê raste ke profîlê xo de ala kurdan û nameyanê bi kurdî xebetnenê, xo zey kurdêke welatperwer ramojnenê û êrişê erc û nirxanê kurdan kenê, heta bi manîpulasyonêke pergalin nîfaq û nakokiyan fînenê mîyanberê şarê kurdî. 

Bi nê awayî lebetênê ke hem keda nîmseserre ya têkoşîna azadîya kurdan bêqedr û bênirx ramojnê hem zî derbe bidê yewîtîya şarê kurdî ro. Elbet şarê ma yê ke zanaye yê û karê trolan û manîpulasyonkaran ra hayîdar ê, nînê xapênayîşî û parekerdişanê nê gurûhê trolan nêgînê verçiman û îtîbarî estê. La ancî zî zanayîş û hayîdarbîyayîşê qismêke tenê bes nîyo. 

Şarê ma yê ke binê tesîrê parekerdişanê nê trolan de manenê zî zêde estê çi heyf. Nê semedî ra lazim o xebatêka baş a medyaya komelî bêro kerdişî, ê gurûhî yew bi yew bêrê deşîfrekerdişî û medyaya komelî baş bêro bikarardişî. No gure û wezîfe zêdehî kono milê ciwanan ser. Na keda pancas serran keda bi hezaran şarê ma ya ke têkoşîna azadî de daya. 

Keda cinî, mêrdan, pîrik û kalikan, keda ciwan û tûtanê ma ya ke semedê heqê ziwan û nasnameyê xo bidest bifînê nê rayîrî de daya. Gere ma wayîr ro keda înan vecîyê û ma rayîr nêdê ke gurûhê newînî fek berzê nirxanê ma. Lazim o ma medyaya komelî nê hetî de baş bixebetnê û na seha de têkoşîna xo aver berê. Sey ke yeno zanayîşî têkoşîna azadî û têduştîye bi rayîrê siyasetî, xebatanê komelî û rocê ma yê eyro yî de zî bi xebetnayîşê medyaya komelî eşkena baştir netîceyan bido.