Perwerdeyê bi ziwanê daye
Bi bacanê înan kitabê dibistanan yenê amadekerdişî, heme hacetê bînî yê asîmîlasyonî yenê peydakerdişî û tûtê kurdan pê yenê asîmîlekerdişî. Rocê ma yê eyroyî de ke hetêke prosesê çareserîye yeno qiseykerdişî, hetê bînî ra nîjadperestîya faşîstanê ke bi serran hetê desthilatî ra ameyê fîtiknayîşî xo ramojnena, şarê ma bi metanet, bi bawerî û aştîwazî hewl dano hemkarîya prosesê çareserîye bikero.
Sey ke yeno zanayîşî heqê perwerdeyê bi ziwanê daye, heqêke bingeyên ê ferdan o ke dibistanan de bi ziwanê daye xo perwerde bivînê. Hem goreyê qanûnanê heqê merdiman ke dinya de yenê naskerdişî û qebûlkerdişî, hem zî goreyê ayetanê ke Homa Tealayî merdimahî rê nazil kerdê ke yew tira sûreya Rûmî ayete 22yin a ke (Tede de wina dayo zanayîşî; 'Û nîşaneyanê Ey ra yew zî ke eno erd û ezmanî afernayê û ziwanê şima zeypê nêviraştê û rengê şima zî zeypê nêviraştê. Bi raştî enê nîşaneyî gelêk nîşaneyê pîl ê bi qey merdimanê zanayan ê ke bi enê çîyan zanê û xo pê gênê.’)
Heqê ti merdim yan zî rejîmêke çinê yo ke ziwanê şarêke yan qewmêke goreyê kêfê xo ra qedexe bikero û astengî ser de rono. Çi heyf ke nê desthilatê ke xo misliman ramojnenê, wexta ke vatiş yeno serê heqê şarê kurdî yê ziwanî, benê minafiqêke û heqê kurdan ê ziwanî desteser kenê û bi nê kerdişanê xo ayetanê Quranê Kerîmî înkar kenê. Loma zî şarê kurdî, se serran ra zêde yo ke hetê heqanê xo yê ziwan û nasnameyî de mexdûr yeno verdayîşî, rast ro kerdişanê desthilatê minafiqan ê teberê merdimeyî de yeno û çinê yeno hesabkerdişî. Her çiqas Başûr de şarê kurdî resayo heqê xo yê perwerdeyî zî, her hîrê hetanê bînan de astengîyê minafiqan ê hetê heqê ziwan kurdkî de domnenê.
Sey her serre, emserr zî waştiş û hêvîya ma na bî ke bi se hezaran tûtê kurdan ke çerxêke derg ê asîmîlasyonî de derbas bîyê, serra newî ya perwerdeyî de bibê wayîrê heqê xo yê merdimî yê perwerdeyê bi ziwanê daye ke heqê înan o bingeyên o. Çi heyf ke dagirkerê tekpawtoxî yewa xo ra nêameyî war û emserr zî çerxê helênayîşî tûtanê ma ser de bi verdewamî da şuxulnayîşî. Bi hezaran tûtê kurdan ke pîyê înan desthilatan rê leşkerî kerda û heme erkê hemwelatîye bi ca ardê û her tim zî bi ca anê nasname û ziwanê xo ra bêpar ameyê verdayîşî. Bi hezaran tûtê kurdan heqanê xo yê bingeyênan ra bêpar yenê verdayîşî ke maye înan û pîyê înan quriş bi quriş bacê xo danê û bi yê bacanê înan meaşê mamosteyanê ke çerxê asîmîlasyonî bi xo yê, yeno dayîşî.
Bi bacanê înan kitabê dibistanan yenê amadekerdişî, heme hacetê bînî yê asîmîlasyonî yenê peydakerdişî û tûtê kurdan pê yenê asîmîlekerdişî. Rocê ma yê eyroyî de ke hetêke prosesê çareserîye yeno qiseykerdişî, hetê bînî ra nîjadperestîya faşîstanê ke bi serran hetê desthilatî ra ameyê fîtiknayîşî xo ramojnena, şarê ma bi metanet, bi bawerî û aştîwazî hewl dano hemkarîya prosesê çareserîye bikero. Heqê kultur, nasname û perwerdeyê bi ziwanê daye heqêke bingeyên ê merdimeyî yo, qedexekerdişê înan zî sûcêko merdimeyî yo. Heta ma nê heqanê xo bi dest bifînê do têkoşînê ma bidomyo. Helbet lazim o ma nê zî nêkerê xo vîr ra ke wezîfe û erko pîl kono serê milê şarê kurdî. Wexta ma qiseykerdişê ziwanê xo de îsrar bikerê, tûtanê xo dir û heme qadanê cuyînî de bi ziwanê xo qisey bikerê û şarê ma heme pê dir nê heqanê xo de îsrar bikero do desthilatî zî mecbûr bimanê ke gaman berzê.
