Tuncer Bakirhan: Divê di qanûnê de cudahiyên kategorîk tune be

Rêxistina DEM Partiyê ya Mêrsînê li Kongre Sarayi ya Şaredariya Bajarê Mezin a Mersînê 3yemîn Kongreya xwe pêk anî. Li gel Hevserokê Giştî yê DEM Partiyê Tuncer Bakirhan gelek kes beşdar bûn.  Kongreyê bi hilbijartina dîwanê û merasîma rêzgirtinê dest pê kir. Hevserokên DEM Partiyê yên Mersînê Bedriye Kuş û Reşat Aşan ewil axivîn. Bedriya Kuş û Reşat Aşan, ji rêveberiya nû re serkerftin xwest.

 Hevserokê Giştî yê DEM Partiyê Tuncer Bakirhan jî axivî û got: “Têkoşînek ger raboriya xwe bizanibe û li ser ked û berdêlên raboriyê geş bibe biqîmet û watedar e. Têkoşînek ku raboriya xwe bizanibe û dahatûya xwe li ser vê ava bike, tu zor û zilm nikare wê têk bibe. DEM Partî bi vê kevneşopî û keda raboriyê têkoşîna xwe bi berdêlên îro re kiriye yek û têkoşîna heq, hiqûq, aştî û demokrasiyê dide. Bibîranîna raboriyê û bi zanebûna nirx û raboriyê em dikarin dahatûyek têkoşînê û demokratîk ava bikin. Me di vê çarçoveyê de êşên mezin kişand û berdêlên mezin dan. Rêzdar Abdullah Ocalan di 27’ê Sibatê de bangek bangek girîng kir. Ew jî Banga Aştî û Civaka Demokratîk bû. Qanûna ku dê bê Meclisê divê cudahiyên kategorîk neke. Divê qanûn ne qanûnek nîvco, tam be. Divê ev qanûn sedemên derketina PKK’ê û pirsgirêka Kurd çareser bike û giştgir be. Herwiha divê ev qanûn mercên rêzdar Ocalan amade bike ku karibe vê pêvajoyê bi rêve bibe. Wek DEM Partî rol û misyona me dê li gorî pêşxistina vê pêvajoyê be. Heta zimanê Kurdan azad be, Kurd di erdnîgariya xwe de û li metropolên lê dijîn azad bijîn em ê daxwazên xwe bînin ziman û têkoşîna xwe berdewam bikin. Em baş dizanin ku ev qanûn dê daxwazên Kurdan, kedkaran û bindestan dabîn neke lê dê bibe destpêkek, deriyek nû vebike. Ji bo zimanê me, nasnameya me, ji bo edaleta aboriyê û ji bo dahatûya ciwanên me dê deriyek vebike.”

Piştî axaftinan raporên xebat û darayî hatin xwendin. Piştre Eylem Sonuvar û Adnan Şahîn wek Hevserokên DEM Partiyê yên Mersînê hatin hilbijartin.