Tom Barrack: Êrişên Îsraîlê rîska pevçûna rasterast a bi Tirkiyeyê re dihewîne
Balyozê DYAyê yê Enqereyê Tom Barrack diyar kir ku êrişa Îsraîlê rîska pevçûna leşkerî ya rasterast a bi Tirkiyeyê re dihewîne.
Balyozê DYAyê yê Enqereyê û Nûnerê Taybet ê Iraqê Tom Barrack hişyarî da ku êrişa Îsraîlê ya li ser baregeha hewayî ya Ebû el-Duhûr ku li bajarê Îdlibê yê Sûriyeyê ye, di xetereya veguhastina pevçûneke leşkerî ya rasterast de ye ku dikare Sûriye û Tirkiyeyê jî bikişîne nav xwe. Barrack di hevpeyvîna xwe ya bo rojnameya Îsraîlî Jerusalem Postê de got: "Hêzên tirk bêagahdar bûn ku balafirên Îsraîlê ber bi wê baregeha Sûriyeyê ve diçin an jî armanca operasyonê çi ye. Ji ber vê yekê îhtîmal e ku ew fikirîbin ku rastî êrişê hatine û balafirên xwe yên şer rakiribin."
'Gûftûgoyên veşartî berdewam dikin'
Barrack bal kişand ku êriş "giran û cihê fikarê" bû û got: "Lê belê, nebûna windahiya canî û mezinnebûna rewşê em rehet kirin." Barrack anî ziman ku der barê ji nû ve aktîfkirina yekîneya rêgirîkirina pevçûnan a Îsraîl-Sûriyeyê de "gûftûgoyên veşartî" berdewam dikin û got: "Tirkiye dikare bi awayekî rasterast an jî nerasterast tev li vê pêvajoyê bibe."
Barrack destnîşan kir ku avakirina yekîneyeke hevkariyê ku tê de personelên ku bi zimanên tirkî, erebî, îngilîzî û îbranî bi herikbarî diaxivin 24 saetan li ser kar bin dê bi kêrhatî be û tekezî li ser giringiya ragihandinê kir.
'Sûriye ji bo Îsraîlê ne metirsî ye'
Barrack diyar kir ku armancên "êrişkarane" yên hikûmeta demkî ya li Sûriyeyê beramberî Îsraîlê nîn in û tenê armanca wê "parastina serweriya xwe" ye û got ku li gorî dîtina DYAyê binesaziya sivîl ji bo Îsraîlê metirsiya ewlehiyê çênake.
Barrack da zanîn ku domandina sîstemeke havanasiyê ya navxweyî ya ewle û pêbawer a Sûriyeyê girêdayî qada vegirtina radarên sivîl ên karker e û ev îfade bi kar anîn: "Em berdewam bawer dikin ku ev hewcedariya teknîkî nabe pirsgirêke ewlehiyê û gûftûgoyên zêdetir dikarin alîkariyê bikin ku ev mijar li gorî dilê hemû aliyan zelal bibe."
Barrack diyar kir ku DYA dixwaze ji bo kêmkirina aloziya di navbera Tirkiye û Îsraîlê de bibe alîkar û got: "Plana serok Trump rêyeke pêkan ku eger qad û piştgiriya pêwîst jê re bê dabînkirin dikare bigehîje serkeftinê pêşkêş dike."
