Îran de mîyanê yew serre de tewr tay 2.003 kesî ameyî îdamkerdene
Ajansê Aktîvîstanê Heqanê Merdiman yê Îranî da zanayene ke, nê serranê peyênan ra yew serre de Îran de tewr tay 2.003 kesî ameyî îdamkerdene, nînan ra 69 kesî seba sebebanê sîyasîyan bîyî. Goreyê datayan, 10 serranê peyênan de tewr zaf îdamî emser virazîyayî.
Bi wesîleya Roja Têkoşînê Vera Cezaya Mergî ya Dinya, Merkezê Îstatîstîkî yê Ajansê Aktîvîstanê Heqanê Merdiman yê Îranî (HRANA), rapora xo ya serane ya derheqê înfazkerdişê cezaya mergî ya Îranî weşanaye.
Rapora ke mabênê 10ê Teşrîna Verêne 2025 û 8ê Teşrîna Verêne 2026î de bi 1.857 raporan ameye amadekerdene, tede ame qeydkerdene ke seransere Îranî de tewr tay înfazê 2.003 cezayanê îdamî ameyî belgekerdene. Heman wext de ame belgekerdene ke 230 kesan zî cezaya îdamî girewte.
Ame dîyarkerdene ke, no nîsbet goreyê serra verêne, înfazê cezayanê îdamî de se ra 29 zêdebîyayîşî nîşan dano. Ame vatene ke serra verêne 1.553 kesî ameybî îdamkerdene. Reyna ame îfadekerdene ke 10 serranê peyênan de averajê îdamanê ke Îran de yenê înfazkerdene 710 o û wina nîsbetê emserî averaj ra se ra 182 hîna zêde yo.
Dîqet ame antene ser ke taybetmendîyanê muhîman yê raporî ra yew zî çinbîyayîşê şefafîya fermî ya. Ame dîyarkerdene ke, înfazanê belgekerdeyan ra se ra 95ê ci bi nimitkî an zî bê ke medyaya fermî yan zî herêmî de bêrê eşkerakerdene ameyî kerdene, tenya se ra 5ê ci çimeyanê fermîyan yan zî mehellîyan ra ameyî xebere dayene.
Raporî de, ame îşaretkerdene ke 47 cinîyî ameyî îdamkerdene. Çer kesê ke nasname û vîyarteyê dewayanê înan ameyî tesdîqkerdene, ame qeydkerdene ke wexto ke sûcê îdîakerdeyî ameyî kerdene 18 serre ra qijêr bîyî. Ame qeydkerdene ke raporî de 69 kesî zî seba sûcdarîyanê sîyasî û asayîşî ameyî îdamkerdene. Nînan ra 35 kesî bi protestoyanê vera hukmatî yê Çeleyê 2026î reyde têkildar bîyî; ame vatene ke tenya aşmanê Nîsan û Gulane de zî 29 kesî ameyî îdamkerdene.
