Rencbero demserrane û gilêşkîya nîjadpawitoxe
Tayn derdorê ke nêşayo merdimeyî ra paya xwi bigîrê, benê maşaya destê nê hêzanê tarîyan, yê ki zey qijneyana duskiyayê bedenê şaranê Tirkiya ro û ebi goniya ki lej de rijêna ya warî benê, yê ki heme erjeyanê komelî, netewî, kariteyî û bawerî renga sipê de vînenê.
Welatê ma, hetê pergala netewe-dewleta, ebi tewrêno zanaye û vernamekerde ya, heme erjeyanê merdimane ra mehrûm verdeya yo. Welatê ma, halênê qûtî de, şêligê ci veyşan verdeya yo, loqên nanî rê muhtac mendo. Seweta/qandê ki bişê diligê xwi bikerê, mixabin, neçar manenê ki şirê bajaranê Tirkiya yê zey Zonguldak, Bursa, Yozgat û xeylekên bajaran de bixeftiyê.
Ma zî, xemgîneyêna xorî, ya ki zeriya ma sero giraneyî virazêna ya vînenê ki, her sera ki nê rencberê kurdî şinê û ma zî benê şahîd ki, heman rencberê demserane, hetê tayn ganiyê ki zey diratoxanê haranê ya yenê galekerdene, ci rê heqaret beno, yenê derb kerdene. Çirê çiki ê kurdî yê, hişmendiya serdesteyî ya tirkan de cayê înan çiniyo, ganî ê, seweta ki kurdî yê bîrê lanetkerde ne Zonguldak de û bajarvanê bînan de galekerdena karkeranê demserî, yê ki Sîlopî ra şîbî Zonguldak de bixeftiyê, riyo raşt yê faşîsteya nijadpawitoxyî finakî vet meydan.
No riyo ki heme erjeyanê komekî, merdimeyî ra, ebi awa nehayana şoyayo, teqez paşverû yo, peyramende yo. Teniya merdimê ki mezgê ci de nêweşiya şaristanî; xezebê netewe-dewleta nijîneyayo şenê nê karê winayênî bikerê.
Nê kerdenê merdimeyî ra teverî, raşteya xwi de heqîqeta komelnasîya tirkanê nîjadpawitoxan merdimeyî ro danê silasnayene. Ma, ewladê şarê kurdî, nê kerdenan ra na jiwere wanenî ki ma ebi têvereyêna senîna rî bi rî yê.
Zaf hayranteyo û wazena hayrî wendoxan bianca na jiwere ser. Na pêla nijadpawitoxe ge gen, goreyê ayamê siyasi yena harkerdene na pêla nîjadpawitoxeyî, nexasim, demo ki ravêrdeyî ya werey amyayene/aşitî dest pey kena de, hetê destanê tariyana yena kişkerdene.
Oxrê şarê ma, şêligê welatê ma, o ki hetê na pergala çimveyşana, veyşan verdeyayo, seweta/qandê diligê/debara xwi şinê, bajarvanê Tirkîya de xeftênê, kar û barê serdestan yê rewr laxinî kenê. Wexto ki şinê zî bêguman, heman bajaran de, ebi kariteyî ya xwi ya cuyenê, ebi ziwanê xwi ya vajor benê.
Kotî de beno wa wija de bo, seweta ki şarê ma ebi kariteyî ya xwi ya cuyenê, ebi ziwanê dayîke xwi kurdî ya qisey kenê, raştû galeyanê xezebênan yê nîjadpawitoxan yenê. Nexasim nê rojanê peyênan de, rojê ki zagona çarçoveyê vijiyaya de, nê galeyê, hetê tayn mezganê tariyana yenê kişkerdene.
Tayn derdorê ki nêşayo merdimeyî ra paya xwi bigîrê, benê maşaya destê nê hêzanê tariyan, yê ki zey qijneyana duskiyayê bedenê şaranê Tirkiya ro û ebi goniya ki lej de rijêna ya warî bene, yê ki heme erjeyanê komelî, netewî, kariteyî û bawerî renga sipê de vînenê û wazenê renga sure de alawê û bikerê loqê rantî, do lasera na ravêrdeyî ya komelê aşitî û demokrasî de ber bierzê, çebiyê siloyê mêjûya dîmlaştkerdê ser.
