Xoverdayîş ra ber rayîrêk çin o

Parlamenterê DEM Partî Omer Faruk Hulakuyî ard ziwan ke êdî dewleta tirke de huqûq çin o û xoverdayîş ra ber rayîrêk zî çin o.

Tepişteyê dewaya PKK û PAJKî 27ê teşrîna peyêne ya 2023î ra nata seba azadîya Serekê PKKyî Abdullah Ocalanî û çareserîya meseleya kurdan grevê vêşanîye de yê. 4ê nîsane de grevê vêşanîye derbazê safhaya diyîne bîye. Tepişteyî mehkemeyan boykot kenê û tewrê pêvînayîşan nêbenê.

Hulakuyî ard ziwan ke Tirkîya de sîyaset bi temamî teng bîyo û vat: “Seba ke na tengîye biqeda ganî tecrîdê vera Birêz Ocalanî bêro wedaritene. Abdullah Ocalan seba çareserîya meseleya kurdan muxatabo tewr girîng o. Tecrîdê vera Birêz Ocalanî çareserîya demokratîke û aştîya komelkîye asteng keno.''

Hulakuyî bale ante ser ke tecrîdê Îmraliyî dûştê qanûnanê zereyî û mîyanneteweyîyan o û vat: “Tecrîdê Îmraliyî reyde pêro welat yeno tecrîdkerdene. Îqtîdarê AKP-MHPyî atmosferêko winayên aferna ke dişmenî, nîjaperestîye zêdîyayê. Îqtîdar seba ke payan ser de bimano Birêz Ocalanî tecrîd keno. La no tecrîd tedaya ameyoxê şaranê Kurdistan û Tirkîya keno.''

Hulakuyî îfade kerd ke grevê vêşanîye yê tepişteyan vera sîstemê bêhuqûqî îtîrazêko girîng o û vat: “Vera tepişteyanê sîyasîyan îşkenceyê sîstematîkî yenê kerdene. Nê kerdişî çarçewa dişmenîye de yenê kerdene. La dişmenîya vera kurdan faydeyê çîyêkî nêkena. Îşkence, surgunkerdiş, astengkerdişê tedawîyanê tepişteyan û vêşnayîşê înfazê înan nîşaneya polîtîkaya tecrîdî ya. Tepişteyan vera ney dest pê grevî kerd. Eke welatêk de dewlete huqûqî ra dûr kewta uca de hînî xoverdayîş û çalakîye ra ber rayîrêko bîn çin o.''

Hulakuyî da zanayene ke binpaykerdişê heqanê merdiman û tedaya vera tepişteyanê sîyasîyan dewam kenê û bi nê hawayî keyeyanê tepişteyan rê zî îşkence yeno kerdene. Hulakuyî vat: “Zîndanan de têkoşîn û xoverdayîşê pîlî est ê. Bi destekê keyeyanê tepişteyan û têkoşînê înan ma eşkenê peynîya tecrîdî bîyarê.''