Vera rojnamegeran şîdet

Polîsanê dewleta tirke sereştişê vera rojnamegeran de berî şikitî, çeke naye sereyê rojnamegeran, destê înan pey ra kelemçe kerdî û rojnamegerî erdî de derg kerdî, heqaretê înan kerd û rojnamegeran rê gefî wendî.

Çarçewa Serdozgerîya Komare ya Anqara de ewro Anqara, Stenbol, Wan, Amed, Riha û Mêrdîn de polîsan eşt xeylêk keyeyan ser û buroyê Anqara yê Ajansê Mezopotamya (MA) ser.

Sereştişan de Mudira Karanê Nuşteyî ya MA Dîren Yurtsevere, muxabîrê MA Selman Guzelyuz, Zemo Aggoz, Berîvan Altane, Hakan Yalçin, Emrullah Acar û Ceylan Şahînlî ameyî destbendkerdene. Muxabîrê JINNEWSî Habîbe Erene, Oznur Degere û Derya Rene zî ameyî destbendkerdene.

Goreyê agahîyan Derya Rene tehqîqatêkê cîyayî ra ameya destbendkerdene.

Buroyê Anqara yê MA de cigêrayîşê polîsan dewam keno. Buro de dest nîya fotografan ser û fotografê Nagîhan Akarsela ke Silêmanî de amebî qetilkerdene, ame dirnayene.

Polîsan sereştiş de berî şikitî, çeke naye sereyê rojnamegeran, destê rojnamegeran pey ra kelemçe kerdî û erdî de rojnamegerî derg kerdî, heqaretê înan kerd û rojnamegeran rê gefî wendî.

Dîya zanayene ke polîsêkî wina Berîvan Altane tehdît kerde: “Ez zanena ke to rê se bikera. Hele ma tîya ra şorê ti do bivîne.''

Sereştişêkê bînî de zî polîsan bi vateyê 'Ti tirk î' heqaret kerd û çeke naye ferdanê keyeyî.

Polîsan dest na kompîter, qelem, rojname, kovara kurdkî, karta nasnameyî û 100 kitaban ser.