Tepişteya cinîye raştê şîdetî yena

Zîndanê Manavgatî yê Antalya de tepişte Zîlan Demîre hetê gardîyanan ra ameye gefwerdene û raştê şîdetê psîkolojîkî ameye.

Tepişteyan ra Tuba Serte 2yê êlule de bi telefonî keyeyê xo de qisey kerd û qalê tedaya zîndanî kerd.

Tuba pare kerd ke sergardîyane tim tepişteyan rê teda kena, nêngan çînena û gefan wanena.

Gardîyanan 28ê tebaxe de tepişte Zîlan Demîre zî bi şîdet û zorî eşte koxûşê ci. Tuba wina qalê serebûtî kerd: “Sergardîyane gardîyananê camêrdan bi cop û kelemçeyan reyde eşt koxûşê Zîlane ser. Tîya de bi saetan nînan Zîlane rê heqaret kerd, a tehdît kerde. Ma raştê binpaykerdişanê heqan yenê. Tepişteyî hucreyanê yewkesî û hîrêkesî de manenê. Ma do verê teda û îşkenceyan de sereyê xo nêarê war.''

Keyeyê Tuba îfade kerd ke ê seba asayîya kênaya xo qerqilîyenê.