'Semsûr de cenazayî bê qeydkerdişî wedarîyenê'

Parlamenterê HDPyî Garo Paylanî dîyar kerd ke Semsûr de êyê ke merdî bê qeydkerdişî yenê wedaritene.

Goreyê eşkerayîya peyên a AFADî heta nika 20 hezar û 318 kesan dinyaya xo bedilnaye û badê wird erdlerzanê girdan heta nika 1700 erdlerzê wirdî qewimîyayî. Çimeyê herême vanê bi hezaran kesan dinyaya xo bedilnaye la îqtîdarê AKP-MHPyî hûmara raşte eşkera nêkeno.

Parlamenterê HDPyî yê Amedî Garo Paylanî badê erdlerzî zîyaretê Semsûrî kerd. Paylanî hesabê xo yê medyaya sanale de vat: ''Cenazayê ke binê xirban ra yenê vetene, zafane bê qeydkerdişî hetê nas û merdimanê înan ra yenê wedaritene. Çi heyf ke hûmara merdîyan hîna zaf a.''