Seba Tugluke veng dîya NYyî

Seba ke Aysel Tugluke bêra veradayene bi mektubêke venga Neteweyanê Yewbîyayeyan ame dayene.

Tirkîya û dinya ra 43 baroyan, rêxistinanê heqanê merdiman û rêxistinanê huqûqî seba ke Asyel Tugluka ke nêweşa demansî ya la zîndan de tepişîyena bêra veradayene Neteweyanê Yewbîyayeyan (NY) rê bi waştişê “mudaxeleyê lezabezî” mektubêke şawite.

Mektube Raportoranê Vera Îşkence û Kerdişê Xirabî yê NYyî, Raportoranê Xoserîya Dadger û Avûkatan, Raportoranê Rewşa Pawitoxanê Heqanê Merdiman, Grûba Xebata Vera Tepiştişanê Keyfîyan, Raportoranê Weşîya Mental û Fîzîkî û Raportoranê Heqanê Bindestan rê erşawîyaye.

Mektube de ame vatene ke zîndananê Tirkîya de binpaykerdişê heqanê merdiman vera zêdîyenê û Aysel Tugluk rixmê nêweşîyanê xo zî bera nêdîyena. Mektube de ame waştene ke cade seba Aysele Tugluk mudaxeleyo lezabez bêro kerdene. Mektube de wina ame vatene: “Aysel Tugluk û tepişteyê bînî cade wa bêrê veradayene, rêxistinê heqanê merdiman ê mîyanneteweyî ganî zîndanan zîyaret bikerê.” ANQARA