Raywanî resayî Şemrex

Raywananê Azadîye seba azadîya Serekê PKKyî Abdullah Ocalanî veng da û pare kerd ke no rayraşîyayîş do verê komara demokratîke abikero.

Rayraşîyayîşê Azadîye baskanê Wan û Qersî ra 1ê sibate de dîyabî destpêkerdene û siba do bireso Amedî. Baskê Wanî resa qezaya Şemrexî ya Mêrdînî.

Şarî bi dawul û zurnayan Raywanê Azadîye pêşwazî kerdî. Şarî û raywanan pîya govende girewte. Dima girseyî pîya bi slogananê “Bijî Serok Apo”, “Bê Serok jiyan nabe” û “Bijî berxwedana zindanan” rayraşîyayîşo merkezî kerd.

Merkez de Parlamentera DEM Partî Perîhan Koca qisey kerd û da zanayene ke ê seba aştî, têdûştî û azadîyêka mende û rûmetêne rayraşîyayîşê xo kenê. Koca vat: “No rayraşîyayîş do verê komara demokratîke abikero û qederê kurdan dîyar bikero. Ma tîya de grevê vêşanîye yê tepişteyan û Nobeta Edaletî ya dadîyan selam kenê. Ma do pîya aştîye awan bikerê.''

Namzedanê Hemşaredarîya Şemrexî ya DEM Partî Hamdîn Demîr û Kudret Uçare zî raywanî selam kerdî û vat: “Heta ke na mesele çareser biba rayraşîyayîşê ma do dewam bikerê. Wext wextê azadîye yo.''

Raywanê Azadîye Şemrexî ra dima do verê xo bidê qezaya Xana Axparî ya Çinarî.