Hindistanê kirîna nefta Iraqê da rawestandin
Li gorî ajansa Reutersê Saziya Neftê ya Hindistanê karê barkirina keştiyên xwe yên neftê li deryagehên Besrayê betal kirine. Tê gotin sedema betalkirinê, bi girtina Tengava Hurmizê ve girêdayiye.
Ajansa nûçeyan a Reutersê der barê rawestandina kirîna nefta Iraqê ya ji aliyê Hindistanê ve, agahiyên nû parve kirin.
Ajansê ragihand ku Saziya Neftê ya Hindistanê karên barkirina keştiyên neftê li deryagehên Besrayê betal kirine. Çavkaniyê ragihand ku ev rawestandin û betalkirin bi girtina Tengava Hurmizê û şerê di navbera DYA û Îranê de ve girêdayî ye.
Hat diyarkirin ku kompanyaya parzûnkirinê ya hikûmî ya Hindistanê ku wekî “Mangalore” tê naskirin, hemû peymanên xwe yên kirîn û hawirdekirina nefta Iraqê betalkirine.
Her wiha Hindistanê xwediyên keştiyan hişyar kirine ku ji ber xirabûna rewşa ewlehiyê û gurbûna aloziyan, bi tu şêwazî nêzîkî Tengava Hurmizê nebin.
Hêjayî gotinê ye ku di sala 2025an de, nêzîkî ji sedî 20ê tevahiya nefta hawirdekirî ya Hindistanê ji aliyê Iraqê ve hatibû dabînkirin. Ev yek jî bibû sedem ku Iraq bibe yek ji bihêztirîn dabînkerên nefta xav ji bo wî welatî.
