Zulfu Lîvanelî: Ganî ma bibê teşwîqkerdoxê haştîye

Muzîsyen û nuştox Zulfu Lîvanelî ajansê ma rê qisey kerd û waşt ke îqtîdar gamanê şênberan bierzo.

Lîvanelîyî 1ê êlule Roja Haştîye ya Dinya pîroz kerde û vat: "Wa Roja Haştîye heme dostanê ke hesretê haştîye ancenê, înan rê pîroz bo."

Lîvanelîyî bale ante têkilîya kultur û haştîye ser o: "Têkilîya kultur û haştîye têkilîyêka nêabirnayox a. Kultur bi xo çalakîyêka haştî ya. Fehmêko hunerî ke şerî teşwîq keno, xovera nêbeno; ma ey hunerî ra nêhesibnenê. Tujkerdişê merdiman û şawitişê ciwanan mergî ser huner nîyo. Huner bi heme şaxanê xo haştîye rê xizmet keno. Wexto ke ma tarîxî ra ewnîyenê, hertim şaîr, nuştox û fîlozofê ke haştîye pawitêne mendî; yê bînî nêmendî."

Lîvanelîyî vat huner hîsê weşîye yê zerrîya merdimî vejeno meydan: "Huner manaya bawerkerdişê zerrîya merdimî ya. Seke Yaşar Kemalî vatêne, merdimê tewr xirabî de zî toximêkê weşîye est o. Huner naye teşwîq keno. Seke Charlîe Chaplînî vatêne 'ez teşwîqkerdoxêko haştî ya', huner haştîye teşwîq keno; hîsê merdimîye ano vîrî.

Şerto verên ê merdimbîyayîşî empatî yo: ti dejê xo hîs kenî, la ganî ti dejê hemverê xo zî hîs bikî. Ziwanê medya û sîyasetmedaran de ti naye nêeşnawenî; her çî beno tena hûmarêk. La wexto ke hunermendî mojnenê ke oyo hemverê to zî merdimêk o, dej anceno û keyeyê ci est o, çîyêko ecêb vejîyeno meydan. Xebera '100 hezar kesî ameyî kiştene' tu çî nêano ziwan; la wexto ke ti bi berhemêko hunerî o çîyo ke ame yew keyeyî ser bimojnî, zerrîya her kesî pê dejena."

Lîvanelîyî vat ganî gamê ke komelî rê bawerî bidê bêrê eştene: "Nînan ra yew veradayîşê Selahattîn Demîrtaşî yo. Wexto ke çîyêko wina bibo, komel hîna zaf nê averşîyayîşan ra bawer keno. Çunke yew hetî de qalê efûyan beno, hetêk de zî ke sîyasetmedarêko sey Demîrtaşî yo ke haştîye pawita, bi serran o zîndan de yo, nakokîyêk virazeno.

La reyna zî haştîye haştî ya. Dinya de vateyêko haştîye ra rindêr çin o. Ez zerrîya xo ra wazena ke herinda merg û pêkewtişan de rojê haştîye bêrê. No xeyalê cuya min o. Mi vatêne 'ez verê ke naye bivînî nêmirî'. Ez resaya emrê xo yê 80 serran; înşalah ma do bivînê."

Lîvanelî vengdayîşê Rayberê Şarê Kurdî Abdullah Ocalanî sey çîyêko şakerdox erjna: "Îngilîstan de IRA reyde haştîye ame viraştene, Îspanya de Bask de ame viraştene. Ma bi serran o nuştêne: 'Tekane rayîrê nînan muzakere yo.' Zaf dejî ameyî antene, zaf merdimî merdî. Nika ke herinda şîdet, pêkewtiş û çekan de haştîye ameye, no çîyêko zaf şakerdox o. La nika sere û wijdanan de têmîyanîyêk est a; seba hewanayîşê aye çalakîyê rehetkerdoxî lazim ê. Ganî bi veradayîşê Selahattîn Demîrtaşî dest pêkero. Fikrê min o şexsî no yo."