Zext û binpaykerdişê rejîmê Îranî yê vera netewe û pêrabesteyanê cîyayan dewam kenê
Pêla destbendkerdiş û tepiştişê çalakvan û welatîyanê netewe û pêrabesteyanê cîyayan hetê rejîmê Îranî ra dewam keno. Heto bîn ra zext û çewisnayîşê vera keyeyanê qurbanîyanê nawnayîşan resayo yew sewîyeyêka metirsîdare.
Dezgehê Heqanê Merdiman HRANA derheqê pêla binpaykerdişanê rejîmê Îranî yê vera welatîyan û pêrabesteyanê dînî û neteweyî de yew rapor vila kerd.
Ame dîyarkerdene ke wextê viraştişê merasîmê çeleyî yê Meysam û Mucteba Weysî yê ke bi guleyanê rasterastan yê hêzanê rejîmî ameybî qetilkerdene de, hêzanê çekdaran di kesî yê endamanê keyeyê nê di birayan, bi nameyanê Ferwed Weysî û Ferhad Xefûrîzade destbend kerdê. Goreyê agahîyan Ferwed Weysî û Ferhad Xefûrîzade xelkê Kirmanşanî yê û dînê Yarsanî ra yê, dima ke ameyê destbendkerdene, ameyê berdene bi yew cayo nedîyar.
Ame destnîşankerdene ke şaristanê Mihabadî de zî di welatîyê kurdî bi nameyanê Mistefa Îbrahîmî û Kemal Pîranpûr hetê hêzanê asayîşî ra ameyê destbendkerdene û dadgerê Mihabadî qet yew agahî û eşkerayîyêke nêdaya keyeyanê destbendkerdeyan.
Eynî rapor de ame ragihandene ke 26 welatîyê Behayî yê ke serra 2016î ra nata înan rê dosyaya asayîşî ameybî akerdene, dima ke ameyê veradayene, reyna seba mehkeme ameyê vengdayene û seba sepnayîşê cezayan kewtê binê zextanê giranan yê edlîye.
Goreyê raporî, nawnayîşanê peyênan de 18 welatîyê ke Erebê Sunî yê Ehvaz de ameyê destbendkerdene. Ame dîyarkerdene ke zêdeyîya înan doman û ciwan ê, la heta nika nasnameyê înan nêameyo tesdîqkerdene.
