YRJ’yî şehîdê çapemenîya azade vîr ardî

Yewîya Çapemenîya Cinîyan (YRJ) bi wesîleya serrgêra şehadetê rojnamegeran Gulîstan Tara, Hêro Behadîn û Necmedîn Sînanî yew eşkerayîye weşanaye. 

Eşkerayîye wina ya:

“Bi nameyê Yewîya Çapemenîya Cinîyan (YRJ) ma bi serberzî û dej her di pêşenganê Çapemenîya Azade Gulîstan Tara û Hêro Behadîn vîr anê. Hemrayî Gulîstan û Hêro 23ê Tebaxa 2024î de, netîceya hêrişê teyaraya bêmerdime ya biçeke ya dewleta tirke ya îşxalkere de ke vera erebeyê înan ame kerdene, qezaya Sedsadiqî ya bajarê Silêmanî yê Başûrê Kurdîstanî de şehîd bîyî.

Pêşengê Çapemenîya Azade Gulîstan û Hêro wayîrê dewaye bîyî, waşt ke mîyanê serebûtan de bê û serebûtan cîhan rê biresnê, înan o ke bi serran nêeşkayî vengê xo biresnê yan zî dewaya xo vajê û qala ameyoxê xo bikerê, waşt ke bibê vengê înan.

Gulîstan Tara û Hêro Behadîn têgêşaybî ke problemê cinîyan tenya yew babeta resnayîşî (çapemenîye) nîya, labelê babêtêka ke girêdayîyê vurîyayîşê komelkî û sîyasî ya û heqê cinîyan o ke bibê wayîrê qerarî û bieşkê bi qerardarî şanika xo binusê. Serê na bawerîye, kamera û qeleme girewtî xo dest, raştîya cinîyan û têkoşînê înan resnayî. A bawerîye de bîyî ke afernayîş û keda cinîyan layîq ê ke bêrê dîyene, eşnawitene û belgekerdene. Heman wext de ma embaz Necmedîn Sînanî zî vîr anê, ke 23ê Tebaxa 2023yî de wexto ke wazîfeyê xo Jin TV de ardêne ca, hêrişo ke vera erebeyê ekîbe ame kerdene de rayîrê Qamişlo-Amûdê ser o şehîd bi û heman hêriş de hemraya ma Delîla Egîd bi giranî birîndar bîye.

Hêrişo ke vera ekîba JIN TV’yî û hêrişo ke vera rojnamegeran Gulîstan Tara û Hêro Behadîn ameyî kerdene, ke heman tarîx de pîya bîyî, tesaduf nîyê. Labelê astê hedefgirewtîşê sîstematîkî yê rojnamegeran ke wazîfeyê xo yê resnayîşê heqîqetî anê ca, nano çiman ver. Heto bîn ra, nê hêrişî tesdîq kenê ke çapemenîya azade hema zî hedefê înan hêzan a ke wazenê vengê azadî bêveng bikerê û heqîqetî binimnê.”