YJA Star: Serewedartişê "Jin, Jiyan, Azadî" newe ra ganîbîyayîşê şaran o

Fermandarîya YJA Starî vat ke Îdeolojîya Xelasîya Cinîyan ke Rayber Apoyî 1998î de aver berde û felsefeya "Jin, Jiyan, Azadî" heqîqetê cuya neteweya cinîyan ana: "Na felsefe azadîya cinî ke tarîx de cuye viraşta û şekil dayo komelî, esas gêna; hêvîya newe ra ganîbîyayîşê cinîyan a ke vera heme hêrişanê qatilê kastîkî û zîhnîyetê serdestî xover dana. Na felsefe tena felsefeyêka herêmkî nîya, felsefeya cuye ya neteweya cinîyan a ke bêşîkê merdimîye ra dinya de vila bena."

Fermandarîye ard ziwan ke heqîqetê cinî ke vera rejîmê melayanê Îranî ke cinî bi nameyê exlaqê îslamî kerda metaya namûsî, xover dana, verê heme Îran de sey serewedartişanê "Jin, Jiyan, Azadî" morê xo tarîxê azadîya cinîyan ro dayo: "Nê serewedartişî ke bi şexsê Jîna Emînî û Şîlêr Resûlî aver şîyî, xopawitiş û serewedartişê cinî û heme şaran ê vera rejîmê melayan ê faşîstî yê. Senî ke komelkîya ke afirnayîşê cinî Kurdîstan ra dinya de vila bîye, hereketê xoverdayîşê cinîyan ê seba azadîye zî bi nê serewedartişan Kurdîstan ra vila bîyo. Tradîsyonê xoverdayîşê cinîyan ê Îran û Rojhelatê Kurdîstanî ke bi Şîrîn Elemhûlî dest pêkerd, bi serewedartişanê dormeyê Jîna Emînî berz bî û no vera rejîmê melayan vindertişo tewr gird û tehdîdo tewr gird o."

Fermandarîye vat ke çeleyê 2026î de hêrişanê barbaran ê qewetanê HTŞyî yê vera cinîyan ê Heleba Rojawanî de serewedartişê "Kezî" dest pêkerd û Rojawan ra heme dinya de vila bîyî: "Serewedartişê 'Jin, Jiyan, Azadî' tena reaksîyonê demêk nîyê; îfadeyê waştişê cinîyan ê ciwîyayîşê azadî yê beden û heqîqetê xo yê vera sîstemê pederşahî yê. Vera rejîmê Îranî dinya de çalakîyê birnayîşê porî û bi serewedartişanê Kezî apeydayîşê porî bîyî sembol; porê cinî bî îfadeyê heqîqetê cuye ke demokrasî tede yena apeydayene. No heqîqetê serewedartişêk o ke belûcî, azerî, kurd û farisî tede ameyî pêser."

Fermandarîye ard ziwan ke heta rejîmê melayan demokratîk nêbo, haştî û seypêyîya komelkî nêvirazo û îdamî nêvindê, xoverdayîş û serewedartişê şaran zî nêvînenê; serranê vîyarteyan de bi hezaran merdimî cuya xo ra bîyî û rejîm hema zî bi îdaman despotîzmêko gird ferz keno. Fermandarî heme şehîdê şorişî ardî vîrî û vat ke seba ciwînayîş û pawitişê na felsefe verê heme çîyan ganî cinî xopawitişê xo aver berê: "Cinîya ke xopawitişê aye çin o, her wext hedefê zîhnîyetê serdestî ya. Demokratîkbîyayîşo rastikên ê Komara Îslamî ya Îranî azadbîyayîşê cinîyan ra vîyareno. Ma venga heme cinîyan danê ke sey qewetê xopawitişê cinîyanê ke zîndananê Îranî de tepişte yê û qerarê îdamî yê înan est o, serewedartişan berz bikerê û bi şîarê 'Jin, Jiyan, Azadî' yew vengî de bêrê pêser. Ma sey YJA Starî zî bi na munasebete danê zanayene ke seba ciwînayîş û pawitişê felsefeya 'Jin, Jiyan, Azadî' heme wezîfeyanê xo anê ca."