Yıldızo MHPij: Komîsyonê şopnayîşî 10 rojan mîyan de awan beno
Feti Yıldızê MHPijî vat ke o hêvî keno ke ravêrê meseleya kurdan de Meclîs de "Hewteyêk, 10 rojan mîyan de" komîsyonê şopnayîşî awan bibo. Yıldızî pawit ke qey krîzê fonî Meclîs de awankerdişê komîsyonê cigêrayîşî rê hewce çin o.
Meclîs ewro dest bi serra neweyî ya qanûnvetişî keno û sernameyê muhîman ê rojevî ra yew zî ravêro ke derheqê meseleya kurdan de dewam keno, yo. Dima ke Serekê Meclîsî Numan Kurtulmuşî eşkera kerd ke do çarçeweya ravêrî de Meclîs de komîsyonêkê şopnayîşî awan bibo, ewro Hetkarê Serekê Pêroyî yê MHP’yî Feti Yıldızî ra zî yew eşkerayîye ameye.
Yıldızî Meclîs de verpers da persanê rojnamegeran. Yıldızî derheqê persê ke do komîsyonê şopnayîşî Meclîs de key awan bibo de, wina vat: “No hewte derheqê pratîzekerdişê qanûnê çarçeweyî yê warî de, Meclîs de goreyê nîsbetê temsîlîyetê partîyan bi tewrbîyayîşê wekîlan komîsyonêk awan beno. Wezîfeyê nê komîsyonî maddeyê 7. yê qanûnê çarçeweyî de zixm eşkera yê. Şopnayîş, tu mueyîdeyê ci çin o, eşkeno teklîfê qanûnî bido, eşkeno tewsîyeyan bikero. Hûmara endaman belkî zey Komîsyonê Îstîxbaratî 17 yan zî yew hûmarêka kêmtir ba. Ez hêvî kena ke hewteyêk, 10 rojan mîyan de awan bibo. Ez texmîn kena ke Serekê ma yê Meclîsî seba agahîdayîşê endaman herhal ewro, meşte partîyan rê nuşte erşaweno.”
Feti Yıldızî verpersê persê “Serekê Meclîsî vat ‘Tena do fealîyetanê qanûnvetişî yê Meclîsî bişopno’ la şima vat war. Mîyan de yew ferq esto?” wina da: “Pratîkê qanûnê çarçeweyî do bêro şopnayene. Tena Meclîs nîyo.”
Yıldızî dîyar kerd ke endamê komîsyonî do hetê partîyan ra bêrê agahîdayene û da zanayene ke hûmara endaman zî do goreyê nîsbetê temsîlîyetê partîyan yê TBMM de eşkera biba.
