Xeza de 24 saetanê peyênan de 15 kesî cuya xo ra bîyê
Hêrişanê Îsraîlî yê vera Xeza de 24 saatanê peyênan de, hîrê gedeyî û cinîyêk zî tede, 15 fîlistînijî cuya xo ra bîyê. Ofîsê Medya yê Hukmatê Xeza eşkera kerd ke wextê adirbestî ra hata nika 3 hezar û 795 binpaykerdişê heqan ameyê vînayene.
Hêrişê tewr giranî herêma Xeza ya başurê rojhelatî de, Taxa Zeytunî de bîyî. Nê hêrişan de cayê roniştox û çadirê koçberan ameyî hedefgirewtiş, zaf keyeyî xeripîyayî û bi seyan sîvîlî bêçare mendî ke reyna koç bikerî. Taxa Nasrî de zî hêrişê hewayî de zaf merdimî birîndar bîyî û Mehkemaya Şîfa dîyar kerd ke birînê tay merdiman giran ê. Verfekîya Pawitişê Sîvîlî dîyar kerd ke Taxa Tuffah û herêmanê orte û başûrî de zî hêrişê topan dewam kenî.
Ofîsê Medya yê Hukmatê Xeza eşkera kerd ke peymana adirbestî ra pey, Îsraîlî nê adirbestî binpay kerd. Nê prosesî de hezar û 168 fîlistînijî cuya xo ra bîyê, 3 hezar û 734 kesî birîndar bîyî û 149 kesî zî ameyî destbendkerdiş. Ofîsî dîyar kerd ke tiranê hetkarî ra tena se ra 35ê ci resayo herême û Sînorê Refahî ra zî tena se ra 37ê merdiman rê destûr ameyo dayene. Ofîsê Medya vat ke aşma temmuza 2023î ra heta nika Xeza de hûmara merdeyan resaya 73 hezar û 283 kesî, hûmara birîndaran zî bîya 173 hezar û 864 kesî.
Heto bînî ra, Heyetê Sînorê Heqanê Merdiman ê Erebî, xebata xo ya herêmî ya ke mabênê 6-10ê temmuze de Misir de kerdbî, raporê xo yê destpêkî weşana. Raporî de ameyo dîyarkerdene ke înan ca dayo merkezê lojîstîk ê hetkarîya merdimî yê Arîşî, nêweşxane û cigêrayîşî ke Berê Sînorî yê Refahî de ameyê kerdiş û seba şahîdanê birîndaranê demê şerî qeydî girewtî.
Heyetî dîyar kerd ke amancê înan o yo ke rewşa mexdûranê şerî qeyd bikerê, cigêrayîşê prosesê resnayîşê hetkarîya merdimîye bikerê û goreyê standartanê mîyanneteweyî delîlan û şahîdîyan kom bikerê.
