Xeylê şaristanan de bi slogananê ‘Şehîd namirin’ vîrardişî
Vîrardişê ke seba êyê ke têkoşînê azadîye şehîd bibî, xeylê şaristanan de virazîyenê, bi tewrbîyayîşê seyan kesan dewam kenê. Bi rayberîya MEBYA-DER’î (Komeleya Paştdayîş, Pêkerdiş, Yewbîyayîş û Kulturî ya Keyeyanê ke Dêrgûşa Şaristanîyan de Merdimên Xo Vînî Kerdê), seba şehîdanê tarîxanê cîya-cîyayan vîrardişî dewam kenê.
Qezaya Rezanî de Salona Veyveyî ya Geterlerî de vîrardiş roja xo ya diyîne de dewam keno. Salone rê posterêko pîl yê Rayberê Şarê Kurdî Abdullah Ocalanî û pankartê "Em bi serbilind in cangoriyên Kurdistanê", "Pusula rayberîya û rotayê şehîdî raşira nêvejîyeno" û "Şehîd namirin" ameyî aliqnayene. Reyna salone bi flamayanê zer, sûr û keskan û fotografanê êyê ke canê xo dayo, ameye xemilnayene. Şarî sloganê "Şehîd namirin" û "Bîjî Serok Apo" qîrayî. Vîrardiş bi duayan dest pêkerd.
Seyan kesî ke saetanê sibayî ra nata yenê, keyeyan rê serweşîye wazt û vat ke ê bi domananê înan sereberz ê. Reyna merkezê Erxanî û dewa Xendeqî; Hêne; merkezê Pasûrî û dewanê Şênê, Hewrê û Deyasî; merkezê Qarazî û dewanê Mehmedîye, Şikefta û Lasileynî; Farqîn; Bismil; merkezê Xana Axparî û dewanê Elwendî û Hemsî; merkezê Lîcê û dewanê Kiledalê û Cofitnê de zî vîrardişî dewam kenê.
Mersin: Qezaya Akdenîzî de Keyeyê Tazîyeyî yê Taxa Guneşî de vîrardiş roja diyîne de bi sloganê "Şehîd namirin" dest pêkerd. Cayê vîrardişî de pankartê "Şehîdên me rûmeta me ne", "Em şehîdên azadiyê bi bîr tînin" ameyî daliqnayene. Maseyan ser o fotrafê şehîdan û Ocalanî reyde qerenfîlê sûrî ameyî ronayene.
Şirnex û Hezex: Rêzgirewtiş û sloganî
Şirnex: Merkez de Keyeyê Tazîyeyî yê Mehmet Emin Acarî de bi rayberîya MEBYA-DER’î vîrardiş yeno viraştene. Sereyê sibayî de nêzdîyê şehîdan ra pîya, nûnerê partîyanê sîyasîyan û dezgehanê komelê sîvîlî tewrê ci bîyî. Vîrardiş bi rêzgirewtiş dest pêkerd û şarî tim sloganê "Şehîd namirin" vatî.
Hezex: Taxa Atakentî ya Hezexî de roja yewîne ya vîrardişî dest pêkerd. Wêne û flamayan ra pîya, pankartê "Şehîd ronahîya rêya me ne" û wênê Ocalanî ameyî daliqnayene. Şarê taxe ra xeylê kesî hewş de roniştî. Vîrardiş bi marşê “Çerxa şoreşê” dest pêkerd.
'Ma wa wayîrê mîrasê xoverdayîşî vejîyê'
Program de Wekîla DEM Partî ya Şirnexî Newroz Uysal Aslan qisey kerd û wina vat: "Keso ke yeno tîya, nê vîrardişî zerrîya xo de hîs keno. Şehîdan ra ma rê mîraso tewr pîl cuyê înan o. Ganî ma pêro cuye înan xo rê bikerê nimûne. No şîn teyna yê keyeyan nîyo, şînê heme şarê kurdî yo. Ê ma rê mîrasêko xoverdayîşî verdayî û ganî ma zî wayîrê nê mîrasî vejîyê. Eke ewro şarê kurdî çar perçeyan de ser payan o û statuyêk wazeno, bi saya înan o. Ma înan rê mînetdar ê. Êyê ke seba azadîye têkoşîn kerd, ma do seba armancanê înan têkoşînê xo rê dewam bikerê."
Silopîya, Qileban, Elkê û Sêrt
Şaristananê bînan de zî programî bi heman tewrbîyayîşî dewam kerdî:
Silopîya: Camîya Valî Kamîl Acunî de bi marşê Çerxa Şoreşê û sloganê "Şehîd namirin" vîrardiş ame kerdene. Qiseykerdişan de mesajê wayîrvejîyayîşê mîrasê şehîdan ame dayene.,
Qileban: Taxa Şantîye de Keyeyê Tazîyeyî de pankartê "Şehîdên me rûmeta me ne" ameyî daliqnayene û program bi rêzgirewtiş dest pêkerd.
Elkê: Seba Sozdar Abî (Jînda Faraşîn) dewa Germavî de keyeyê xo ver de program ame viraştene, bi tewrbîyayîşê xeylê kesan sloganî ameyî qîrayene.
Sêrt: Salona Veyveyî ya Ugurî de bi pankartanê zey "Têkoşîna wan rêya me ronî dike", "Cewherê jiyana me şehîdên me ne" û wênê Ocalanî programê vîrardişî ame rêxistinkerdene.
