Xeylê bajaran de şehîdê 14ê temmuze ameyî yadkerdene
Ewropa de xeylê bajaran de şehîdê Xoverdayîşê Rojeyê Mergî yê Girdî yê 14ê temmuze ameyî yadkerdene; qiseykerdişan de bale ame antene têkoşînê azadîye yê kurdan de muhîmîya tarîxî ya nê xoverdayîşî ser o.
Almanya, bajarê Kasselî de Merkezê Kulturî yê Kurdan de bi wesîleya Roja Yadkerdişê Şehîdanê 14ê temmuze çalakîyêka yadkerdişî ame viraştene û xeylê kurdîstanijî tewrê ci bîyî. Programî de sînevîzyono ke derheqê xoverdayîşê 14ê temmuze de yo, ame nawitene. nameyê KOMNAVî ser o Alî qisey kerd, bale ante muhîmîya tarîxî ya xoverdayîşê 14ê temmuze ser o û ard ziwan ke ruhê xoverdayîşî ewro zî têkoşînê azadîye rê rayîr mojneno.
Qibris, Lîmasolî de yadkerdişî de şehîdê 14ê temmuze û vindîbîyayeyê Qibrisî vîrê hemparî de ameyî têhet. Keyeyê vindîbîyayeyanê rûman, esîrê şerê 1974î û dostê şarê kurdî mesajê "Vîr sînor nêzano, dej mîlîyet nêzano" dayî.
Parîs, herêma Villeneuve de Merkezê Komelê Demokratîkê Kurdan de seba pêşengê xoverdayîşî Kemal Pîr, Mehmet Hayrî Durmuş, Akîf Yilmaz û Alî Çîçekî yadkerdiş ame viraştene.
Merkezê Kulturî yê Demokratîkê Kurdan ê Mantes La Jolie de zî şehîdanê 14ê temmuze ra teber, welatperwerê kurdan Îmam Namoglu ke Parîsî de ganê xo ra bî, ame yadkerdene; qiseykerdişan de seba mîrasê xoverdayîşî mesajê wayîrvejîyayîşî ame dayene.
Fransa, bajarê Creilî de kombîyayîşê şarî û programê yadkerdişê şehîdan ame viraştene. Uca de averşîyayîşê sîyasî yê aktuelî û proseso ke yeno ramitene, ameyî erjnayene; bale ame antene muhîmîya rêxistinbîyayîş, piştîdayîş û beşdarbîyayîşê aktîfî yê komelê kurdan ê Ewropa ser o.
Bajarê Reimsî de yadkerdişî de zî bale ame antene vîrê kolektîfî yê şarê kurdî de cayê xoverdayîşî û hewcedarîya çareserîya demokratîke ser o.
Frankfurtî de Merkezê Komelê Kurdan de şexsê şehîdanê aşma temmuze de şehîdê azadîye ke rêzanê Têgêrayîşê Azadîye yê Kurdan de têkoşîn kerd û ganê xo ra bîyî, ameyî yadkerdene.
Fransa, Nantesî de Komeleya Kulturî ya Kurdan de ame tekîdkerdene ke Xoverdayîşê Rojeyê Mergî yê 14ê temmuze hetê pawitişê estbîyayîş, ziwan, kultur û têkoşînê azadîye yê şarê kurdî de gamêka çarnayîşî ya tarîxî ya.
Cenevre de zî şehîdanê 14ê temmuze ra teber, Alî Haydar Kaytan ame yadkerdene û bale ame antene rolê tarîxî yê xoverdayîşê Zîndanê Amedî ser o.
