Xelatê Rojnamegerîya Cinîyan ê Gurbetelli Ersoz yê 2. resayî wayîranê xo
Rojnamegere û xebatê ke Xelatanê Rojnamegerîya Cinîyan ê Gurbetelli Ersozî yê 2. de xelat girewtî, ameyî eşkerakerdene. Xelatî hetê Komeleya Rojnamegeran a Cinîyan a Mezopotamya ra ameyî organîzekerdene.
Komeleya Rojnamegeran a Cinîyan a Mezopotamya (MKG) dîyar kerd ke xelatî seba xurtkerdişê têkoşîn û gêrayîşê raştîye yê rojnamegerîya cinîyan û seba piştîdayîşê xebatanê ke vatiş û tecrubeyê cinîyan nawnenê, yenê dayene.
Beşê Xeberanê Kurdkî de xelata verêniye ameye dayene xebera Perêz Remezan a bi sernameyê "Çîroka Aske Kerîm: Birîndarek zindî ya karesata Enfalê û hovîtiya li Nugre Selman". Beşê Xeberanê Tirkî de zî xelata verêniye ameye dayene xebera Elîf Akgul a ke Inside Turkey de weşanîyaye. Xelata Taybetîye ya Jurî zî ameye dayene xebata Gulîstan Gulmuş û Derya Ren a JINNEWSî.
Beşê Xeberanê Vîdeoyinan de xelata verênîye ameye dayene xebata Sewsen Elî û Meryem Reşo ya bi nameyê "Heviya Vegerê" (Hêvîya Ageyrayîşî). Beşê fotografan de xelata verêne ameye dayene eserê muxabira JINNEWSî Nudem Muhammed "Sönmeyen" (Nêpeysyaye); Xelata Taybetîye ya Jurî zî ameye dayene xebata muxabira Ajansa Welat Sema Gezici "Qêrîna Bêdeng".
Xelata Rûmetî ya emserî ameye dayene ê kesan ke Gimgim (Varto) û Kanîreş (Karlîova) de vera projeyanê JESî xoza, warê cuye û ameyoxê xo pawenê. Komele dîyar kerd ke têkoşînê Gimgimî 22ê çeleyî de dest pêkerdo, 3ê gulane de dewa Xwarikî de bi çadirêk bîyo nobete û resayo roja xo ya 155.; dewa Licikî ya Kanîreşî de zî xoverdayîşo ke 7ê tebaxe de vera sondajê şîrketî dest pêkerd, 60 rojî xo dima verdayî.
