Wezîre eşkera kerd: 'Herêma Kurdîstanî de 100 hezarî ra zafêr keyeyî binê sînorê feqîrîye de yê'

Wezîra Xebate û Karûbarê Komelî yê Hukmatê Herêma Kurdîstanî Kwestan Muhammede televîzyonê Rûdawî rê qisey kerd.

Muhammede da zanayene ke krîzê malî yê serra 2013î ra nata qeydê astengdaran o newe nêameyo kerdene û vat: “Nika nêzî 30 hezar hemwelatiyê ma yê astengdarî teberê qeydî de yê û nêeşkenê maaş bigêrê. Ma waşt ke nê 30 hezar kesî bêrê qeydkerdene. Ma verê cû nameyê 13 hezar kesî, raporên înan ê tibî û bi heme belgeyanê înan şawitî Bexda.”

Wezîre Muhammede vata goreyê yasaya ke 2011 de Herêma Kurdîstanî de wejîyaya, ganî maaşê çewêkê astengdarî 250 hezar dînarî ra kêm nêbo la yasa tam nêameya caardene zî arde ziwan. Wezîra Xebate û Karûbarê Komelî Kwestan Muhammede derheqê tabloyê feqîrîye yê Herêma Kurdîstanî de zî reqemê balkêşî pare kerdî.

Wezîre Muhammede vat: “Herêma Kurdîstanî de 100 hezarî ra zafêr keyeyî binê sînorê feqîrîye de ciwîyenê. No, manaya sînorê vêşanîye de biyayîşî de yo.” 

Wezîre da zanayene ke înan waşto ke nê keyeyî butçeya pêroyî ya Îraqî de bêrê hesebiyayene û wina vat: “Wexto ke Bexda destûr bido ma do seba keyeyanê feqîran formê qeydî biweşanê. La di aşmî yê ma Bexda ra seba ke serekwezîr, wezîrê malîye û wezîrê xebate dir pêvînayîş bikerê randevu wazenê û ma hema zî verpersêk nêgirewto.”