Wendekarê Maxmûre seba piştîdayîşê Rojawanî rayîr şîyî

Kampê Şehîd Rustem Cûdîyî yê Maxmûrî de wendekarê heme qademeyan bi 5 kortejan ver bi Meydanê 4ê Nîsane rayîr şîyî.

Wendekaranê ke posterê Rayber Apoyî û pankartê bi nuşteyanê "Bê ziman jiyan nabe", "Zimanê me nasnameya me ye" û "Bijî Serok Apo" girewtbî, Meydanê 4ê Nîsane de eşkerayîyêk daye.

Eşkerayî de bale ame antene polîtîkayanê hêzanê hegemonîkan ê vera şarê kurdan ser o û ame dîyarkerdene ke kurdan seba pawitişê erjanê xo her tim bedelê giranî dayê.

Eşkerayî de ame vatene ke ê sey şarê kampî qebul nêkenê ke kurdkî bi saetan bêra sînordarkerdene. Silam ame dayene xoverdayîşê heme şarê Rojawanî, verê hemînan zî wendekaranê ke seba heqanê xo têkoşîn kenê.

Eşkerayî de venga heme partî, rêxistine û roşnvîranê her çar parçeyanê Kurdîstanî ame dayene ke berpirsîyarîyanê xo yê derheqê azadîya şarê kurdan û Kurdîstanî de bîyarê ca û vera bêedaletîya ke şarê Rojawanî rê vînîyena, bêveng nêmanê. Îdareyê Sûrîye ra zî ame waştene ke fehmê xo yo qilêrin ê înkarê kurdan ra bilez fek verdo.

Peynîya eşkerayîye de wina ame vatene: "Ganî çarçewaya prosesê Entegrasyonê Demokratîkî de nêzdîyê çareserîya problemanê şarê kurdan û şaranê herême bibê û heqê perwerdeyê bi ziwanê dayîke, ke heqo tewr meşrû yo, bêro naskerdene."