Wan de şar Roja Haştîye de seba azadîya Rayber Apoyî qîra

Serkêşîya Platformê Kede û Demokrasî yê Wanî û Platformê Dezgehanê Demokratîkan ê Wanî de bi wesîleya 1ê Êlule Roja Haştîye ya Dinya rayîrşîyayîş û eşkerayîya çapemenî ame viraştene. Bi seyan kesî tewrê rayîrşîyayîşî bîyî ke Dayîkanê Haştîye û cinîyan serkêşîya ci kerde. Rayîrşîyayîşî de sloganê "Bijî Serok Apo" û "Bijî aşitiya gelan" ameyî vatene.

Vervatoxê KESKî yê Wanî Şahîn Karakoyunî vat haştîye tena bêvengbîyayîşê çekan nîya û waşt ke tepişteyê sîyasîyî bêrê veradayene, qanûnê TMKyî bêro hewanayene, astengê vernîya azadîya îfade û rêxistinbîyayîşî bêrê hewanayene, heqê nasname, ziwan û kulturê şarê kurdî bigîrîyo binê temînatî, şuxulnayîşê kurdkî sey ziwanê perwerdeyê bi ziwanê dayîke bireso temînatê qanûnî, xespê qeyûman biqedîyo û qerarê AÎHM û AYMyî bêrê caardene.

Endama Meclisê Dayîkanê Haştîye Hanîfe Kaçak vat: "Ma seba haştîye hazir ê. Oyo ke do na haştîye temîn bikero zî Birêz Abdullah Ocalan o. O bi serran o tecrîd de bî û hema zî tecrîd de yeno tepiştene. Ma sere de azadîya ci û yê azadîya heme tepişteyanê sîyasîyan wazenê."

Nameyê Platformê Dezgehanê Demokratîkan ser o Hemsereka TUHAY-DERî Rengîne Karabulut bale ante ser o ke haştîye demokrasî, seypêyî, azadî û edalet o: "Vernîya Tirkîya de weçînayîşêko tarîxî est o. Ma do vera polîtîkayanê pêkewtiş, înkar û asayîşesasan ê vîyarteyan, rayîrê komelê demokratîkî, hemwelatîtîya seypêye û haştîya menda pîya awan bikerê."

Eşkerayîye bi çepik û sloganan qedîyaye.