Wan de konferansê 'Bi Têkoşînê Azadîya Cinîyan ver bi Komelê Demokratîkî'
Meclîsê Cinîyan ê DEM Partî Wan de bi şîarê "Bi Têkoşînê Azadîya Cinîyan ver bi Komelê Demokratîkî" konferansêk kerd. Konferansî de Ravêrê Aştî û Komelê Demokratîkî, ravêrî de rolê cinîyan û muhîmîya rêxistinbîyayîşî ameyî erjnayene.
Konferanso ke Meclîsê Cinîyan ê DEM Partî Wan de viraşt, tede cinîyê endamê Têgarayîşê Cinîyan ê Azadan (TJA) û Partîya Herêmanê Demokratîkan (DBP) zî ca girewt. Konferansî de ke bi rêzegirewtişî dest pêkerd, rolê cinîyan ê awankerdişê komelê demokratîkî û xebatê çarçewaya ravêrî ameyî erjnayene.
Hemsereka Şaristanî ya Wanî ya DEM Partî Gulşene Kurt bale ante Ravêrê Aştî û Komelê Demokratîkî ser o ke 27ê sibate ra nat yeno ramitene û vat ke ravêr bi pêşengîya cinîyan aver şino. Gulşene Kurt ard ziwan ke amancê konferansî "Statuyê Rayberê Şarê Kurdan Abdullah Ocalanî û akerdişê vernîya nê ravêrî yo" û vat: "Lingê tewr muhîmî yê nê ravêrî rêxistinkerdiş û rêxistinbîyayîş o. Ma zî seba naye tîya yê. Tena Kurdîstanî de ney, Tirkîya de zî ma do seba naye têkoşîn bikerê."
Endama Koordînasyonê Cinîyan a DEM Partî Sûdane Guven derheqê rol û berpirsîyarîya cinîyan a ravêrî de qisey kerd. Aye ard ziwan ke derheqê rêxistinbîyayîşê ravêrî de kêmasîyî est ê û tekîd kerd ke bi kongre reyde awankerdişê komara demokratîke hedef kenê: "Ma do xo bi hewayêko pêtêr rêxistin bikerê."
Badê qiseykerdişanê akerdişî konferans çapemenî rê girewte dewam kerd.
