Vîrardişê Denîz Firate: "Aye bi kameraya xo vera DAIŞ’î şer kerd"
Serrgêra 12. ya şehadetê rojnameger Denîz Firate de dewa Xecê Xatûne de programêko vîrardişî ame viraştene. Temsîlkarê MKG, DFG û partîyanê sîyasî bale antî têkoşînê aye yê rayîrê çapemenîya azade ser û vatî, "Aye nê hêrişî bi qelema xo mojnayî dinya."
Temsîlkarê MKG û DFG’yî bi vesîleya serrgêra şehadetê Denîz Firate, 8ê tebaxa 2014î de hêrişêkî DAIŞ’î yê Mexmûrî ser o de cuya xo ra bîbî, serê mezelê aye yê dewa Xecê Xatûne ya qezaya Elbakî ya Wanî de programê vîrardişî viraşt. Keye, endamê MKG û DFG û temsîlkarê partîyanê sîyasî û rêxistênê sîvîlî tewrê programî bîyî.
Programî de endama MKG’yî ya Wanî, Ceylan Şahînlî, qisey kerd û wina vat: “Denîz Firat zî sey verênanê xo kulturê çapemîya azade domnêni. Aye xo dima raştîyêke verda ke vera DAIŞ’î ke seba heme dinya tehdîtêko gird bi, bi kameraya xo şer kerd. Aye zî sey têkoşeran ke rayîrê heqîqete de bedêl dayê, cuya xo da.”
‘Seba heme Kurdîstanî şerd kerd’
Dima ra birayê Denîz Firate, Seyat Yildiztan qisey kerd û bale ante têkoşînê Denîz Firate ser o û wina vat: “Denîze tena şehîdê ma nîya, şehîdê partîya xo û şarê xo ya. Aye seba xo û keyeyê xo ney, seba heme şarê Kurdîstanî bi kameraya xo şer kerd.”
‘Aye şehîdê Kurdîstanî ya’
Peynîye de Hevserekê Qezaya Ebekî yê DEM Partî, Abbas Aksak, qisey kerd û vat: “Wexto ke DAIŞ’î hêrişê Kurdan kerd, Denîze zî bi kamera û qelema xo xebetîya ke nê hêrişan bimojno heme dinya. Hetanî 8ê tebaxe ke resa şehadete, têkoşînê xo domna. Aye şehîdê Kurdîstanî û çapemîya azad a.”
Program vîrardişî, badê ronayişê vilekan ê serê mezelê aye qedîya.
