Verê Hepisxaneyê Tîpê E yê Amedî de yadkerdişê 14ê temmuze
Serrgêra 44. ya Xoverdayîşê Rojeyê Mergî yê Girdî yê 14ê temmuze de verê Hepisxaneyê Tîpê E yê Amedî de eşkerayîye ameye dayene; bale ameye anetene têkoşînê azadîye yê kurdan de muhîmîya xoverdayîşî ser o.
Çalakîya yadkerdişî ke bi pêşengîya MEBYA-DER, TUHAY-DER û Însîyatîfê 78ijan ame viraştene, rêxistinê komelê sivîlî, temsîlkarê partîyanê sîyasîyan û hemwelatîyan tede ca girewt.
Hemserekê MEBYA-DERî Ramazan Dengizî eşkerayîya hempare wende. Ey ard ziwan ke pê vîyartişê 44 serran zî dewlete derheqê binpaykerdişê heqan ê Hepisxaneyê Amedî de gama rîbirîbîyayîşî neeşte û vat ke ganî berpirsyarî hesab bidê û hepisxane bibo mekanê vîrî: "A roje ra nat waştişê şarê kurdî û keyeyanê xoverdayoxanê Zîndanê Amedî no yo: berpirsyaranê ê demî ra hesab bêro persayene, merdimîye nê caardişanê hovaneyan ra ders bigîro û seba ke na hovîtî reyna nêqewmîya, Zîndanê Amedî bibo warêkê vîrê merdimîye."
Eşkerayîye de ameye tekîdkerdene: "Tarîxî de heme serewedartişê ke hetê şarê kurdî ra ameyî destpêkerdene, vera înkar, neheqî û bêedaletî, seba pawitişê erjanê neteweyî û rûmetê xo ameyî caardene." Ame îfadekerdene ke Xoverdayîşê Rojeyê Mergî yê Girdî yê 14ê temmuze rayîr da têkoşînê azadîye yê 50 serranê peyênan ê şarê kurdî û Prosesê Haştî û Komelê Demokratîkî yo ke dewam keno, netîceyê nê têkoşînî yo.
Eşkerayîye de venga selahîyetdaranê dewlete ame dayene: "Ma veng danê ke bê ke wext bêro vindîkerdene, cewab bidê vengdayîşê Birêz Ocalanî, seba ke kurd, tirk û heme şarê ke Tirkîya de ciwîyenê, bi kultur, ziwan, nasname, reng, veng, dîn û bawerîya xo biciwîyê û pîya deyîranê wayûbirayîye bivajê."
Çalakî bi eştişê sloganan û hewşê hepisxaneyî de ronayîşê vilikan qedîyaye; dima seba yadkerdişê şehîdanê xoverdayîşî Goristanê Yenîkoyî ame zîyaretkerdene.
