Vera Şaredarîya Bayrakli operasyon: 45 kesî ameyî destbendkerdene
Çarçewaya tehqîqatî de ke hetê Serdozgerîya Komare ya Îzmîrî ra ame destpêkerdene, vera Şaredarîya Bayrakli operasyon ame kerdene û 45 kesî ameyî destbendkerdene.
Serdozgerîya Komare ya Îzmîrî vera Şaredarîya Bayrakli û şîrketa aye ya girêdayeye BAYBEL A.Ş.yî tehqîqatêk ramena. Çarçewaya nê tehqîqatî de serê sibayî operasyon ame kerdene.
Şûbeyê Têkoşînê Vera Sûcanê Malî û Îstîxbaratî yê Mudirîya Emnîyetî ya Îzmîrî operasyonê hemdemî kerdî. Derheqê 48 kesan de qerarê destbendkerdişî est bî; înan ra 45 kesî bi îdîayanê “awankerdişê rêxistine seba kerdişê sûcî”, “rişwet” û “dizdîye” ameyî destbendkerdene.
Mîyanê kesanê destbendkerdeyan de Şaredaro verên ê Şaredarîya Bayrakli Serdar Sandal û Sereka Qezaya Bayrakli ya CHPyî Dîdem Gultekîn zî est ê.
Mîyanê kesan de ke derheqê înan de qerarê destbendkerdişî vejîyayo, rayber û xebatkarê ke verê cû şaredarî û şîrketanê şaredarîye de xebitîyayê, înan ra teber berpirsîyar û wayîrê şîrketanê cîyayan zî est ê.
