Vejîya werte ke di domanê ke sey ‘xokiştiş’ û ‘qeza’ nîyê, ameyê kiştene

Qezaya Wanî Elbâk de Damlanur Sarihana 14 serreye 10ê çeleyê 2024î de, Afyonkarahîsar de zî Yunus Emre Yakaro 4 serre 24ê çeleyê 2026î de weşîya xo kerde vîndî.

Mergê domanan qeydan de sey “xokiştiş” (întîhar) û “qeza” vîyart. Dosyayê ke seba her di domanan akerdîybî ameyî gireotene, la Serekîya Daîreya Cigêrayîşê Sûcanê Ke Kerdoxê Înana Nêzanîyenê ya ke nê aşmanê peyênan de awan bîye, dosyayê her di domanan reyna akerdî.

Derheqê mergê Damlanur Sarihane de beyanê şahîdanê nimitkîyan, îfadeyanê ferdanê keyeyî de nêpêgirewtişî, destê yew gumanbarî de bermayeyê eştişê çekî, tewirê çeka ke hadîse de ameya xebitnayene, serê çekî de çinbîyayîşê şopê engişte û qeydê îrtîbatî yê dima ameyî cigêrayene. Bi nê delîlanê ke ameyî destfînayene, tehqîqat bi şikûgûmanê “qestî ra kiştişî” reyna ame akerdene û dewam keno.

Delîlî ameyî nimitene

Tehqîqato ke derheqê mergê Yunus Emre Yakaro 4 serre, yo ke Afyonkarahîsar de 24ê çeleyê 2026î de weşîya xo vîndî kerde, dîya destpêkerdene de zî vejîya werte ke Yakar cayêko berz ra nêkewto, bi derbkerdene ameyo kiştene. Tehqîqato ke sero nêpêgirewtişê mabenê delîlanê otopsî û îfadeyanê gumanbarî ra ame xorînkerdene de, tesbît bi ke wazîyayo hadîse sey “cayêko berz ra kewtiş” bêro ramitene û wazîyayo ke delîlî bêrê nimitene.

Destbendkerdiş û tepiştişî dayî eşnayene

Wezîrê Adaletî Akın Gurlekî, parekerdişê xo yê medyaya sanale (dîjîtale) de da eşnayene ke çarçeweya tehqîqatê hema akerdeyî û dewamkerdeyî yê Sarihane de, 7ê tebaxe de Tekîrdag, Colemêrg û Wan de 7 gumanbarî ameyî girewtene binê çiman. 

Gurlekî pare kerd ke çarçeweya tehqîqatî de pîyê zirî yê Yakaro 4 serre, B.K. sûcê “qestî ra kiştişê domanî û ezîyetî” ra; kalikê eyê zirî M.K. zî sûcanê “îhmalkarîye ra qestî ra kiştiş û nimitîşê delîlanê sûcî” ra ameyî tepiştene.