TUAY-DER’î kongreya xo viraşte: Ma do bi Serek Apoyî ser bikewê
TUAY-DER’ê Amedî kongreya xo yê Asayîye ya 5. viraşte. Beşdarbîyayoxanê kongre waşt ke Rayberê Şarê Kurdî Abdullah Ocalan azad bibo û wina vatî: “Bi bawerîya Serek Apoyî, ma do nê rayîrî de bimeşê û ma do ser bikewê.”
Komeleya Paştdayîş û Hetkarîye ya bi Keyeyanê Girewteyan û Hukûmwaran (TUAY-DER) ya Amedî bi şîarê “Bi komela demokratîke ameyeyo azad awan kenê” kongreya xo Asayîye ya 5. saloneke qezaya Rezanî de viraşte. Dayîkê Aştîye, aktîvîstê TJA, Endamê TUAYDERî, Hemserekê qezayanê Amedî, endamê DEM Partîye û DBP, temsîlkarê saziyanê sîvîlan û xeylêk kesî tewrê kongre bîyî. Kongre de fotografê Rayberê Şarê Kurdî Abdullah Ocalanî û pankartê ‘Azadîya cinîyan awankerdişê komelê demokratîke ya’ û ‘Cuyêka azade do bi cinîyanê azadan pêkan biba’ ameyî daliqnayene. Kongre seba cangorîyanê azadîye bi deqîqeyêke rêzgirewtişî dest pêkerd. Şîarê ‘Şehîdî nêmîrenê’, ‘Biciwîyo xoverdayîşê zindanan’ û ‘Biciwîyo Serek Apo’ ameyî berzkerdene.
Mesajê girewteyanê sîyasîyan hetê Delale Tellîoglu ra ameye wendene. Mesaj de ame dîyarkerdene ke kongre do hêz bido awankerdene komelê demokratîkî û wina ame vatene: “Zîhnîyeto ke wazeno kurdan çin biko, mecbûr mendo ke qebul biko bê kurdan cuyêke nêbena. Ma bawer ê ke şima do bi na kongreya xo hêz bidê têkoşînê ma.”
Nameyê Meclîsê Dayîkanê Aştîye ra Afîfeye Kartal qisey kerd. Kartale vîr fîst ke ravêrê ‘Aştî û Komelê Demokratîkî’ yê Ocalanî bibo xurt û wina vat: “Heta ke gûnî canê ma de bo, ma do dima rayîrê ey de bê. Heta ke girewteyê nêweşî ver nêdîyê, ez nêvana aştî esta. Eger aştî biba wa Serekê Şarê Kurdî mîyanê şarê xo de bo.”
Kerem Canpolatî bal ant vateyê Ocalanî ser û vat ke nê qanûnê neweyî seba aştîye qet bes nîyo. Dima Zulfîkar Bayramo ke 30 serrî zindan de mendo zî vat: "Raya ma zehmet a. La bi bawerîya ey ma do ser bikewê. Ma xebata şehîdan rê minetdar ê."
Emîne Kaya û Cahît Şik sey Hemserekê TUAY-DER’î ameyî weçînayene.
