Tirkîya de mîqdarê deynê lezabezî yo ke ganî bidîyo de zêdîyayîş

Bankaya Merkezî îstatîstîkê Deynê Teberî yê Lezabezî (KVDB) yê menga Temmuze eşkera kerdî. Goreyê îstatîstîkan ra, stokê deynê teberî yo lezabez o ke ganî Tirkîya bido, îtîbarê aşma Temmuze ra bi 177.1 mîlyar dolarî. Goreyê daneyan ra, stokê deynê teberî yo lezabezî yê bankayan, bi zêdîyayîşê aşmaneyî yo 4.3 ra bi 77.8 mîlyar dolarî. Kredîyê lezabezî û mesulîyetê qîmetanî yê bankayanê zereyê welatî yê ke teberê welatî ra peyda kerdê zî, se ra 23.5 berz bîyî û bîyî 9.8 mîlyar dolarî. Goreyê daneyan mevduatê bankayanê teberê welatî yê Tirkîya de zî, se ra 7 zêdîya û resa 19.8 mîlyar dolaran. Mevduatê bankayan zî bi berzbîyayîşê se ra 1.1 ra resa sewîyeya 21.6 mîlyar dolaran.

Sektoranê bînan de stokê deynî

Mîqdarê deynê sektoranê bînan yê teberê bankayan o ke ganî wextêko kilm de bidîyo, goreyê aşma verêne bi nîsbetê se ra 3.6 zêdîya û resa 74.7 mîlyar dolarî. Nê grube de mesulîyetê kredîyê tîcarîyî yê ke muameleyanê tîcaretê teberî ra virazîyê, se ra 2.4 zêdîyayî û resayî 65.1 mîlyar dolarî. Mesulîyetê ke kredîyanê neqdîyan ra yenê pê zî, se ra 13.1 berz bîyî û bîyî 9.7 mîlyar dolarî.

Stokê deynê teberî yo ke goreyê vadeyê xo, deynê ke dayîşê înan rê yew serre yan zî wextêko hîna kemî mendo gêno xo mîyan, 248.1 dolar (mîlyar dolar) ame hesibnayene. Na çarçewa de mesulîyetê mevduatî resayî 68 mîlyar dolarî, mesulîyetê kredî û qîmetanî zî bîyî 77.8 mîlyar dolarî û zêdîyayî. Vilaşîyayîşê stokê deynê teberî yê lezabezî yê goreyê yewîyanê pereyan de, dolarê DYA’yî se ra 34.3 pay girewt. Se ra 26.5ê stokî Euro, se ra 26ê ci TL, se ra 13.2yê ci zî cîsnanê dowîzanê bînan ra ameyî pê.