Tehqîqatê Gulîstane Doku de cerdevanêk tepişîya
Tehqîqatê Gulîstane Doku de cerdevanê dewe Fatîh Ozmen, bi îdîaya “vîndîkerdiş, bedilnayîş û nimitişê delîlanê sûcî” tepişîya, karsaz Okan Yazici zî bi şertê kontrolê edlîyî serbest dîya. Bi nê hawayî hûmarê tepişteyan vejîya 13. Perskerdişê 15 kesanê binê çiman yê ke cinîya Walîyê verênî yê Dêrsimî Tuncay Sonelî, Handan Sonel zî mîyanê înan de ya, dewam keno.
Dêrsim de tehqîqato ke derheqê wendekara unîversîte Gulîstane Doku ya ke 5ê çeleyê 2020î ra nata vîndîbîyaye ya, yeno rayraberdene de, 17 kesanê pêlê neweyî yê binê çiman ra 2 kesî dima ke muameleyê înan ê emnîyetî qedîyayî, sewqê edlîyeyî bîyî.
Hûmarê tepişteyan vejîya 13
Gumanbaran ra karsaz Okan Yarici û cerdevanê dewe Fatîh Ozmeno ke muameleyê îfadeyê înan Fermandarîya Cendirmeyan a Dêrsimî de qedîyayî, vizêr bi refaqatê cendirmeyan ameyî vetene Edlîyeyê Dêrsimî.
Yariciyo ke perskerdişê ci yê dozgerîye qedîya bi waştişê kontrolê edlîyî, cerdevan Ozmen zî bi waştişê tepiştişî sewqê hakîmîya ceza a sulhî bîyî. Hakîmîye, qerar da ke karsaz Yarici bi şertê kontrolê edlîyî serbest bibo û cerdevan Ozmen zî bi îdîaya “vîndîkerdiş, bedilnayîş û nimitişê delîlanê sûcî” bêro tepiştene. Bi nê hawayî çarçewaya tehqîqatî de hûmarê kesê ke heta nika ameyê tepiştene vejîya 13.
Çarçewaya tehqîqato ke hetê Serekdozgerîya Komare ya Dêrsim û Erziromî ra derheqê vîndîbîyayîşê Gulîstane Doku de yeno rayraberdene de, 21ê temmuze de 15 kesî, 22yê temmuze de zî 2 kesî ameybî girewtene binê çiman. Hûmara kesanê binê çiman bîbî 17.
Perskerdişê 15 kesanê binê çiman ê ke cinîya Walîyê verênî yê Dêrsimî Tuncay Sonelî, Handan Sonel zî mîyanê înan de ya, dewam keno.
