Tarîxê de ewro televîzyonê 'Gelê Kurdistan'î
11ê Êlula serra 1991î de, tarîxê çapemeniya kurdan de gamêka zaf muhîme ameye eştene. Televîzyonê kurdan o azad o tewr verên, "Gelê Kurdistan" dest bi weşana xo kerd. No qedem, weşangerîya kurdan de serdemêkê neweyî da destpêkerdene û verê MED TV’yî, semedê averşîyayîşê weşangerîya dîmenkî bî yew pird. Weşana nê televîzyonî, seba pawitiş û averberdişê ziwanê kurdkî bî çimeyê hêvîye û bîyîşê kurdan mojna heme dinya.
Tarîxê şarê kurdî, heman wext de tarîxêko derg o ke bi têkoşînê ziwan û kulturî yeno şinasnayene. Çapemeniya Kurdan, roja ke rojnameyê 'Kurdistan'î dest bi weşana xo kerd, heta ewro tim binê zext û qedexeyan de menda. Labelê, 11ê Êlula serra 1991î, nê tarîxê xoverdayîşî de cayêkê zaf xususî gêno. Na roje de, Başûrê Kurdistanî de televîzyonê 'Gelê Kurdistan'î dest bi weşana xo kerd. No weşan, tenya destpêkêkê teknolojîk nêbî; eynî wext de asayîşê şarêkî û ziwanê ê şarî bî.
Serranê 1990î de, dinya bi lezî dîjîtal bîyêne û têkilîya mîyanê şaran asan bîyêne. La kurdan rê no heq nêdîyayêne. Televîzyonê Gelê Kurdistanî, na xeta qedexeyan şiknayê. Yew şaro ke ziwan û kulturê xo qedexe bî, nika eşkayêne ekranan de xo bivîno û ziwanê xo bihesno. Semedê şarê kurdî, dîyayîşê yew pêşkêşkarê kurdî ekran de û eşnawitişê ziwanê dayîke, têkoşînê bîyîşî de yew serkewtişo gird bî. Na game, bawerîya şarî bi xo zêde kerde û verê asayîşî akerd.
Eke ma qala tarîxê çapemeniya kurdan kenê, ganî ma qîmetê Gelê Kurdistanî weş bizanê. No televîzyon, bî yew wendegeho ke xebatkarê çapemenîye tede perwerde bîyî. Medyaya Kurdan a ke ewro bi desan televîzyon, radyo û ajansan weşana xo kena, koka xo nê tecrubeyan ra gêna. Gelê Kurdistan, verê weşanê satelaytî yê MED TV’yî, weşangerîya dîmenkî ya kurdan rê bî yew rehber. Îradeyê ke nê televîzyonî afernay, kerd ke kurdî ewro vengê xo biresnê her ca û dêsê bêvengîye bişiknê.
Kişta bîne ra, weşangerîya kurdkî seba nêmirdayîşê ziwanî zaf muhîm a. Ziwanêk, wexto ke tenya keyeyî de bimano, hêdî hêdî vîndî beno. Wexto ke ziwan keweno mîyanê çapemenîye, wexto ke beno ziwanê xeberan, qiseykerdişê rojane û kulturî; o wext ganî maneno. Xususen Kirmanckî (Zazakî) sey ziwanêko ke tehlûkeyê vîndîbîyîşî de yo, hewceyê çapemeniye bi. Heger 11ê Êlule de a gamê nêamêne eştene, belkî televîzyonê ewroyî nêameşkayêne nê astî.
Netîce de, 11ê Êlula 1991î, tenya rojeka tarîxî nîya, sembolê îradeyê şarê kurdî û vîndînêbîyîşê ziwanê kurdkî ya. Ruho ke Gelê Kurdistanî afernayo, ewro zî çapemeniya azade de ciwîyeno. Çapemenîye ziwano, ziwan zî bîyîşo. A roje, kurdan ekranan de vengê xo da eşnawitene û o veng heta ewro deng dano.
