Swîsre de yadkerdişê Madimak, Çorum û Alîşer-Zerîfe

Çalakî bi gulbango ke Pîr Mehmûd Utebayî wend, dest pêkerd. Hemsereka FEDA ya Swîsre Songule Aslan ke çalakî de qisey kerd, bale ante mana û muhîmîya aşma muherreme ser o û ard ziwan ke qirkerdişê Koçgirî, Dêrsim, Mereş, Çorum û Madimakî vîrî nêbenê û têkoşînê heqîqet û edaletî bi qerardarî do dewam bikerê. Aye çalakîya veşnayîşê çekan ê Grûba Haştî û Komelê Demokratîkî ya Silêmanî ard vîrî û ard ziwan ke ganî îradeyê PKKyî yê haştîye cewab bivîno û dewlete seba çareserîya demokratîke gamanê şênberan bierzo.

Dima Temsîlkara FEDA ya Churî Denîze Erkiliç eşkerayîya hempare wende ke hetê FEDA û Yewîya Cinîyan ê Elewîyan a Demokratîke (DAKB) ra amade bîye.

Denîze Erkiliç ard ziwan ke Kerbela tena serebûdêko tarîxî nîyo, vera zulmî sembolê xoverdayîşî yo, û qirkerdişê Koçgirî, Dêrsim, Mereş, Çorum, Sêwas û Gazî refleksê eynî têgêrayîşê dewlete yê înkarker û tekîtî yê demanê cîya-cîyayan ê. Aye tekîd kerd ke polîtîkayê înkar û asîmîlasyonî yê vera elewîyan dewam kenê, cemxaneyî hema sey îbadetxane nêyenê naskerdene û cigêrayîşê heqanê demokratîkan binê zordarîye de yê: " Qirkerdişan reyde bê rîbirîbîyayîşî demokrasî nêbena, bê qedîyayîşê bêcezayîye edalet nêbeno."

Aye ard ziwan ke ganî heqê hemwelatîtîya seypêye ya elewîyan bigîrîyo binê temînatê qanûnê bingeyî, meseleya kurdan bi rayîranê demokratîk û haştîyaneyan bêro çareserkerdene û azadîya cinîyan şertêko bingeyin ê komelê demokratîkî yo. Eşkerayîya hempare bi nê vatişan qedîyaye: "Xeyalê Alîşerî do biciwîyo, xoverdayîşê Zerîfe do biciwîyo, heqîqetê Kerbela do biciwîyo, îsyanê Koçgirî do biciwîyo, vîrê Dêrsimî do biciwîyo, adirê Madimakî heta ke edalet nêro do nêmiro. Ma xo vîr ra nêkerd, ma efû nêkerd, ma do hesab bipersê."

Dima sînevîzyono ke qirkerdişê Mereş, Çorum û Madimakî ra behs keno, ame nawitene. Çalakî de vindertişê semahî yê Songule Aslan û Temsîlkara FEDA ya Cenevre Fîlîze Guven hetê beşdaran ra bi eleqe ame temaşekerdene. Program bi duayanê loqme û panayîşê çeraxî yê Pîr Mehmûd Utebayî, dima zî bi parekerdişê loqmeyê aşureyî ke seba aşma muherreme amade bî, qedîya.