Sûr de Kampanyaya “Bi Keda Kolektîfe Şaristanê Pakî” Teknokent de dewam kerd
Kampanyaya “Bi Keda Kolektîfe Şaristanê Pakî” ke hetê Şaredarîya Sûrî ra yena rayraberdene, Teknokent de bi xebatanê pakîye û agahdarkerdîşî dewam kerd.
Çarçewaya kampanyaya ke hetê Heyetê Rayberîyanê Cayan ê Demokratîkan ra yena rayraberdene de, Teknokent de cadeyan û kûçeyan de xebata pakîye ameye kerdene. Eynî wext de seba şaristanêkê pakî, babeta berpirsîyarîya hemparî de esnafan û hemwelatijan rê broşurê agahdarkerdoxî ameyî vilakerdene.
Hemserekê Şaredarîya Sûrî Gulan Onkol û Adnan Orhan, endamê meclîsê şaredarîye, îdarekarê Rêxistina Qezaya Sûrî ya DEM Partîye, mudurî û personelê şaredarîye tewrê xebate bîyî.
Hemserekan Gulan Onkol û Adnan Orhanî wextê xebate de esnafan û hemwelatijan reyde ameyî têhet. Înan reyde suhbet kerd û babeta pakîye de vîr û waştişanê înan goşdarî kerdî. Waştişê ke hetê hemwelatijan ra ameyî vatene, seba ke biresnîyê yewîyanê eleqedaran, not ameyî girewtene.
Bi kampanyaya “Bi Keda Kolektîfe Şaristanê Pakî” dîqet ame antene ke pakîya şaristanî tenya berpirsîyarîya şaredarîyan nîya, berpirsîyarîya hempara pêro pêrabesteyanê şaristanî ya. Heman wext de seba şaristanêko hîna pak û saxlem, giringîya paştdayîşî û kedaya hemparî rê bal ame antene.
