Stenbol de Goristanê Ermenîyan rê hêriş

Goristanê Ermenîyan ê Surp Garabetî yê qezaya Uskudarî ya Stenbolî de, hetê kes yan zî kesanê ke hema nasnameyê înan nêzanîyenê ra, şeş gorî û yew hênî ameyî texrîbkerdene. Hedîseyî ra dima hetê yewîyanê asayîşî ra tehqîqat dîya destpêkerdene.

Goreyê xebara ke Agos de ca girewta û goreyê eşkerayîya Patrîkxaneyê Ermenîyan ê Tirkîya, hêriş şewa ke 7ê Temmuze 8ê Temmuze rê girê dana de ameyo meydan. Ame vatene ke hêrişkar/o ke dîwarê goristanî ra vîyarto zere, zirar do şeş goran û yew hênî.

Ame îfadekerdene ke hedîse hetê îdareyê weqfe ra yewîyanê asayîşî rê ameyo xebardayene û seba tepiştîyayîşê hêrişkarî/an xebatî dewam kenê. Patrîkxaneyî eşkerayîya xo ya nuştekîye de hêriş şermezar kerd û da zanayene ke seba roşnîkerdişê hedîseyî, ê tehqîqato ke yeno rayraberdene nêzdî ra teqîb kenê.

Serekê Weqfa Kîlîsaya Surp Garabetî ya Uskudarî Rafi Kirkoryanî zî, eşkerayîya xo ya rojnameyê Agosî de vat ke qismê bînî yê hênîyê goristanî ameyo şiknayene û ancîya motîfê xaçî yê sîyanê şeş goran zî ameyê texrîbkerdene. Derheqê faîl yan zî faîlanê hêrişî de hetê meqamanê resmîyan ra hema eşkerayîyêka newîye nêameya kerdene. 

Tehqîqat dewam keno.