Sîyasetmedarê Baskî Zurimendî: Çareserîya problemanê sîyasî rayîranê sîyasî ra vîyarena
Sîyasetmedarê Baskî Igor Zulaika Zurimendî bale ante prosesanê haştîye de muhîmîya dîyalog û munaqeşe ser û vat: "Çareserîya problemanê sîyasî rayîrê sîyasî ra vîyarena. Dersê muhîmî ke tecrubeyanê ma ra vejîyeno, no yo ke problemî nêyenê ereyfînayene."
Berpirsyarê Têkilîyanê Mîyanneteweyî û Polîtîka yê EH Bilduyî Igor Zulaika Zurimendî ke çarçewaya programê ÎHDyî de ame Amed, tecrubeyê xo yê prosesanê pêkewtiş û çareserîye pare kerdî û proseso ke Tirkîya de dewam keno, erjnaye.
Zurimendî ke herêma Baskî ya Îspanya de prosesê pêkewtiş û çareserîye de rolêko aktîf girewt, serra vîyarte merasîmê veşnayîşê çekan ê Silêmanî de zî ca girewt. Ey ard ziwan ke şahidê demêko tarîxî bî, tekîd kerd ke proses zaf taybet o û vat ke ganî rayîrê munaqeşe dewam bikerê. Ey ard ziwan ke merasîmê veşnayîşê çekan seba ci hem hîsî hem fikrî bî: "Rayîrê averşîyayîşî hem fikirîyayîşî hem hîskerdişî ra vîyareno. Seba ke proses aver şêro, ganî nê her di hetî pîya bêrê erjnayene."
'No firsendo ke vejîya, ganî bêro erjnayene'
Zurimendî tecrubeyê xo Tirkîya de reyde muqayese kerdî: "Mîyanê her di prosesan de hem seypêyî hem cîyayîyê muhîmî est ê. Noqtaya hempare ya tewr muhîme, estbîyayîşê di şar û di têgêrayîşanê sîyasîyan o ke îradeyê vurîyayîşî mojnenê. Ma hêvî kenê ke nêzdîbîyayîşê hukmatê tirkan prosesî rê hukmatê îspanyolî ra averêr bo. Tecrubeyê Îspanya de hukmatî firsendo ke vejîya, nêerjna. Seba ma sûrprîzo tewr gird no bî ke hukmatî tedbîrê qanûnî yê lazimî yê seba averşîyayîşê prosesî piştî nêdaye."
Zurimendî tekîd kerd ke ganî taybetîyî muhîmîya prosesî û alternatîfanê ci raşt bierjnê û vat ke rayîrêko bitesîrêr ke herinda munaqeşe bigîro çin o: "Eke taybetîyêk ra yew fikirîyeno ke bê ke ronişîyo masaya munaqeşe do netîceyêko rindêr bigîro, ganî eşkera bêro vatene ke no raşt nîyo. Çareserîya problemanê sîyasî rayîranê sîyasî ra vîyarena. Rasterast tewsîyedayîşê taybetîyan wezîfeyê ma nîyo. Dersê tewr muhîmî ke tecrubeyanê ma ra vejîyeno, no yo ke problemî nêyenê ereyfînayene."
Zurimendî vat: "Çiqas ke ti probleman rew bigîrî dest, hende rind çareser kenî. Verdayîşê çîyan xoserî û pawitiş, dergwext de çareserîyêka rinde nîya." Ey ard ziwan ke seba averşîyayîşê prosesî ganî waştişî eşkera bêrê vetene meydan û herkes berpirsîyarîya xo bîyaro ca: "Ma her çîyo ke kewt ma ser, kerd. Pê ke hetê muqabîlî game neeşte zî ma îcabê berpirsîyarîya xo ard ca, çunke ma vurîyayîş waşt û ma bawer kerd ke no tena bi ardişê berpirsîyarîya xo mumkun beno."
