Sînan Ok: Ganî ma ekonomîya haştîye zî awan bikerê
Sînan Okî ard ziwan ke ganî hetê ekonomîki yê Prosesê Haştî û Komelê Demokratîkî zî bi hewayêko pêt bêro viraştene û vat ke haştîya komelkî bi modelê ekonomîya demokratîke, polîtîkayanê sosyalan ê pêtan û piştîdayîşanê îstîxdamî yê herême mumkun bena.
Pisporê Îstîxdamî Sînan Okî ard ziwan ke çarçewaya prosesî de sazgehînbîyayîşê ekonomîya demokratîke sernameyanê tewr muhîman ra yew o û herême bi serranê dergan o bi problemê bêkarî û feqîrîye rî bi rî ya.
Okî vat ke datayê TUÎK û SGK’yî yê herême halê welatî ra bi hewayêko eşkera cîya benê: "Tîya bîya cografyaya feqîrîye. Tirkîya de raştîya bêkarîye ya cinîyan se ra 20-30 de ya, la gelek şaristananê herême de na raştî bena se ra 60î. Hema her ca de feqîrîyêka girane est a."
Okî tekîd kerd ke problemanê ekonomîkan de sebebê tarîxî est ê: "Polîtîkayê apeymendişî yê nêzdîyê se serran û muhîtê şer û pêkewtişî yê 50 serranê peyênan herême ser o netîceyê giranî viraştî. Eke ma qalê prosesê haştîye kenê, ganî no bi programêko sosyalo pêroyî bêro piştîdayene." Okî ard vîrî ke Wan, Riha, Agirî û Şirnex hetê ameyeyê kesan ra şaristananê tewr apeymendeyan ê Tirkîya ra yê.
Okî vat: "Şer tena bi çekan nêyeno ramitene. Netîceyê polîtîkayan de feqîrbîyayîş, şenikbîyayîşê komelkî, nêweşîya tîryakî û talankerdişê kede giran benê. Coka ganî têgêrayîşê sîyasî yê nikayînî bivurîyo." Ey tekîd kerd ke ganî fek qayûman ra bêro verdayene, şaredarîya komelkî bêro pêtkerdene û butçe û qadroyê şaredarîyan goreyê hewcedarîyanê şarî newe ra bêrê serûberkerdene.
Okî bale ante ser o ke haştîya komelkî tena bi qedîyayîşê pêkewtişan nêbena: "Ganî ma modelêko ekonomîya demokratîke pîya awan bikerê ke pîyaciwîyayîş, entegrasyonê komelkî û hemwelatîtîya seypêye pêt bikero. Ma mecbur ê ke ekonomîya haştîye zî haştîye reyde pîya awan bikerê. Haştî tena prosesêko sîyasî nîyo; ganî bi hetanê xo yê ekonomîk û sosyalan reyde bêro destgirewtene."
