Şilbe de Atolyeya Têkilîya Zîwan, Cinî û Asîmîlasyonî ameye viraştiş
Bi hemkarîya SES û MED-DER’î, bi paştgîrîya Rayberîya Polîtîkayanê Cinîyan a Şaredarîya Yenîşehîrî atolyeya “Têkilîya Zîwan, Cinî û Asîmîlasyonî”, Kitabxaneyê Şarî yê Şilbe de bi tewrbîyayîşê cinîyan ameye viraştiş.
Hemverfeka Meclîsê Kirmanckî û Qadê Ziwanî Şukran Yakute, Endama TJA'yî Bahar Pekere, Hemşaredara Yenîşehîrî Safîye Akdage, endamê meclîsê Şaredarîya Yenîşehîrî, xebatkarê Rayberîya Polîtîkayanê Cinîyan, mamosteyê MED-DER’î, kedkarê weşîye yê SES’î û zaf cinîyî beşdarê atolyeye bîyê.
Atolye de ke bi zazakî ame rayîrberdene, polîtîkayanê asîmîlasyonî yê zîwanî ser o tesîrê ci yê serê cinîyan, pawitişê zîwanê dayîke de rolê ke cinîyan girewtê xo ser o ameyî erjnayîş.
Çarçewaya atolye de cinîyê ke tewrî bîyî, bi vatişê lawikanê zazakî û kilamanê tradîsyonelan paştî daye wayîrvejîyayîşê zîwanê dayîke. Dewamê programî de kedkaranê weşîye yê SES’î seba cinîyan muhîmîya teşhîso rew ê kanserê memikan, metodê cigêrayîşî û rayîranê pawitişî ser o zanayîşî ameyê dayene. Pêşkêşî de ke ameye viraştene muhîmîya teşhîsê rewî ameye îfadekerdene, na babete de derheqê çîyanî de ke ameyê meraqkerdene zanayîşî ameyî dayîş.
