Seyîthan Aydin: Roja ma ya xemgîne de înan zulm kerd ma rê
Seyîthan Aydinî ke birayê xo Wedat Aydin Têkoşînê Azadîya Kurdan de vindî kerdo, vat ke cendirmeyan waşt tazîyeya înan a Mardînî bi "şima destûr nêgirewto" asteng bikerê: "Eke ê çareserîye de samîmî bîyêne, roja ma ya dejî de no zulm ma rê nêkerdêne."
Seyîthan Aydino 26 serre ke di hewteyî ra ver musayo ke birayê ey Wedat Aydin û lajê apê ey Fatîh Aydin şehîd bîyî, ANFyî rê vat ke zulmo ke tazîyeyanê Mardînî de înan rê ame kerdene, bawerîya ey a haştîye şikita.
Aydinî vat ke birayê ey Wedat 2014î de hema lîse de bî ke panc embazanê xo reyde tewrê hereketî bî; Rojawan de hîrê aşmî vera DAÎŞî şer kerd, Qendîl de perwerde dî, 2018î de Şingal de vera jenosîdê êzîdîyan şer kerd û 2019î de herêma Zapî de vera artêşa tirkan şer kerdêne ke şehîd bî.
Aydinî serebûdê tazîye wina vat: "Mardîn de cayêk est o ke şarî bi xo awan kerdo; ma do tazîyeya xo uca de ronê. La wexto ke ma ameyî, ma dî ke no ca hetê eskeran ra ameyo dorpêçkerdene. Înan kilîtê cayî nêda ma û vat 'şima destûr nêgirewto'. Ma şîyî Qereqolê Cendirmeyan ê Pinardereyî, kesî ma reyde eleqe nêbî û muxatab nêbî; ma yew ode ra ameyî şawitene odeya bîne. Çimanê înan ra kînê înan asayêne. Dima vat 'ganî şima qaymeqamî ra destûr bigîrê'; qaymeqamî de zî ma muxatab nêgirewt, mi waştişname da la di hewteyî vîyartî, xebere nêameye. Ma rewşe wekîlanê DEM Partî ra vat, înan Walîtîya Mardînî reyde qisey kerd û qereqolî game peyser eşte, la tazîye de zî uca dewrîye gêrayêne. Eke ê çareserîye de samîmî bîyêne, roja ma ya dejî de no zulm ma rê nêkerdnêe. Ma nê zulmî xo vîr ra nêkenê. Nika vanê çarçewaya Qanûnê Çarçewa de agêrayîşî benê, la heto bîn ra hepisxaneyê neweyî yenê awankerdene; nê tatbîqatî hêvî nêdanê."
