Semedê kurdî deyîre vatene rastê hêrişê nîjadperestî ame: Gerreyê sûcî kerd

Sahilê Ortakoyî yê Beşîktaşê Stenbolî de 19ê Êlule de şan de semedê kurdî deyîre vatene Muhammet Daşdemîr û embazê ci, hetê şexsêk (cinîyêk) ke nameyê ci nêzanîyeno ra raştê xeber û heqaretanê nîjadperestan ameyî. Dîmenanê ke resayî ajansê ma de aseno ke, şexs yeno û muzîsyenan rê xeberan dano (çêr keno). Dîmen de Daşdemîr û embazê xo pers kenê vanê: “Şima çira heqaret kerd”, a zî cewab dana vana: “Ez kena, zerrîya mi wina waşt. Kurdê qirêjîn ê Homayî”.

Goreyê xebera Ajansê Mezopotamyayî, Daşdemîr û avukatê ci Okan Acar şîyî Edlîyeyê Stenbolî yê Çaglayanî û gerreyê sûcî kerd, derheqê qewimîyayeyan de qisey kerdî.

‘Ma nijadperestîye bi hawayêko raşt ciwîyenê’

Daşdemîrî dîyar kerd ke şexse ameye înan het û pers kerd ke deyîra ke vanê kamcîn ziwan de ya û wina va: “Ma zî va kurdkî ya. Ser o heme kurdan rê xeberî dayî. Tayê ke dûrî kewte mi reyna pers kerd, va ti çira xeberan dana. Cinîye va; ‘Semedo ke zerrîya mi wina wazena’. Wa nê bibê delîl, coka mi antî vîdeo. Semedo ke zerrîya ci wina wazena, eşkena ziwan û nîjadê mîlyonana kurdan rê xeberan bido.”

Daşdemîrî vat: “Ma bi belgeyê destûrî ke walîyîye û şaredarîye dayo ma, uca de deyîran vanê. Ma bîzat şinê kewnê îmtîhan. Ma verê endamanê jurî de roşenê û deyîrê xo vanê. Dima ma rê belgeyê destûrî dîyenê. Rixmê destûran zî tayê nîjadperestî yenê kişta ma de muzîkêko berz akenê. Deyîrê ke akenê zî deyîrê nîjadperestî yê. Ma des rojan ra reyêk bi hawayêko duzgun rastê na nîjadperestîye yenê. Kesê ke vanê; ‘Ma kurdî nêzanê bi tirkî vajê’ zî benê. Ma bi tirkî zî vanê. Qasê 2 aşmîyan verî şexsêkî va ‘Şima sahil îşxal kenê. Nê welatî de xora baş a Mehmecîgî (leşkerî) estê’. Qey ma wazenê welatî parçe bikerê, şikûgumanêka wina viraşte. Ma mecbur ê ke vera heqaretanê ke çand û ziwanê ma rê yenê kerdene, nêrazîbîyayîşê xo bimojnê. Ma heqaretê ziwanê kesî nêkenê, wa kes zî yê ma rê nêkero.”

Daşdemîrî teleb kerd ke nîjadperestî wa bêrê muhakemekerdene.

‘Herinda kurdan de miletêko bîn biyêne’

Avukat Okan Acarî zî qewimîyayeyî ardî ziwan û vat ke goreyê qanûnî ganî a cinîye ceza bigîro la semedê polîtîkayanê bêcezayîye ra cinîye bi hawayêko “rehet” heqaret kerdo. Acarî vîr vîst ke înan gerreyê sûcî kerdo û wina dewam kerd: “Ma da zanayene ke heqaret şexsî nîyo; kurdan rê xeberî dîyayê. La dozgerîye bi îsrar sero ‘heqaret’ ra îşlem kerd. Ma waşt ke wa sero ‘kîn û dişmenîya şarî’ ra bêra sûcdarkerdene. Ferqê mabênê nînan o yo ke, sûcê ‘heqaret’î de bi vernîyedayîş yanî pereyêko zaf kêm dayîş eşkenê bixelisîyê. La na rewş heme kurdan rê eşkerakerdişêko nîjadperest o. Herinda kurdan de nameyê miletêko bîn biderîyêne, a cinîye ameyêne tepiştene. Tekane waştişê ma o yo ke cinîye cezaya ke heq kerda, bigîro. Ma zey OHD’yî vera heme hêrişanê ke çand, şar û ziwanê ma rê yenê kerdene, de do têkoşîn bidê.”