Şebneme Korur Fîncanci: Averşîyayîşê prosesî pabesteyê şertanê Îmrali yo

Pawitoxa heqanê merdiman Prof. Dr. Şebneme Korur Fîncanci îfade kerd ke Prosesê Aştîye û Komelê Demokratîkî têna bi bêçekkerdişî nêeşkeno bêro destgirewtene û vat ke demokratîkbîyayîş bingeyê prosesî yo.

Fîncanci îfade kerd ke aştîya raşt û birumete bi temînatê rumetê însanan, hemwelatîya seypêyî û heqan, bi azadîye, edalet û bingeyê tewrbîyayîşê komelkî eşkena bêro ronayene.

Fîncanci ard ziwan ke ganî binpaykerdişê heqanê merdiman ê giranan ê verênan de bêro têrî û vat ke heta ke heqîqet, hesabdayîş û pêardişê mekanîzmayanê tamîrkerdişî nêbê, aştîya mendî mumkun nîya. Fîncanci îfade kerd ke qedîyayîşê pêkewtişî destpêkerdiş o û vat ke temînatê aştîye demokrasî yo.

Fîncanci îfade kerd ke demokratîkbîyayîş bingeyê Prosesê Aştîye û Komelê Demokratîkî yo û vat ke averşîyayîşê prosesî pabesteyê şertanê Rayberê Şarê Kurdî Abdullah Ocalanî yo. Fîncanci vat: ''Seba muzakereyî ganî resnayîşo bêmabên, resnayîşê zanayîşî û temasê bi aktoranê komelkî yê cîya cîyayan hewce keno. Proses ganî pabesteyê kesan nêmano, bi mekanîzmayanê dezgehî yê ke wayîrê temînatê huqûqî yê bêro rayraberdene.''

Fîncanci îfade kerd ke rîyê pêkewtişan ra barkerdişo bizor, feqîrîye, problemê xizmetê weşîye, ters, travma qewimîyayî û nê zî seba şarî problemê weşîye û vat ke seba weşîye ganî heqîqet vejîyo werte, mekanîzmayê edalet û tamîrkerdişî bêrê ronayene.

Fîncanci ard ziwan ke ganî komelo sîvîl, rêxistinê cinîyan, odayê meslekî, sendîkayî, dezgehê heqanê merdiman û akademîyî tewrê prosesî bibê û vat ke muzakere nîno manaya qedîyayîşê têkoşînê heqî. Fîncanci vat ke ganî bêvenkerdişê çekan nêro manaya hişkerdişê komelî û seba xurtkerdişê tewrbîyayîşê komelkî û waştişê demokratîkbîyayîşî veng da.