Seba vergumanê dawaya JÎTEM’ê Qoserî Hasan Atîlla Ugurî qerarê destbendkerdişî
Tehqîqatê mergê wezîfedarê MÎT’îyo Kaşîf Kozînogluyî de derheqê 4 kesan de qerarê destbendkerdişî dîya. Înan ra yew zî, wexto ke Kozînoglu merd embazê ey ê qoxuşî Hasan Atîlla Ugur o. Ugur, serranê 1990an de pê têkilîyanê JÎTEM’î û 22 cînayetan amebi rojeve û derheqê ey de dewa amebî akerdene.
Tehqîqatê Serekdozgerîya Komare ya Sîlîvrî yo ke seba mergê wezîfedarê MÎT’îyo Kaşîf Kozînogluyo ke 2011 de Zîndanê Sîlîvrî de merd, dewam keno. Çarçewaya tehqîqatî de Stenbol û Enqere de eyni wext de operasyon ame kerdene.
Operasyon de Hasan Ataman Yildirim, Alî Îşgoren û Necîp Dogano ke heqê înan de qerarê destbendkerdişî esto, ameyî destbendkerdene. Albayo xanenişîn Hasan Atilla Uguro ke qoxuş de embazê Kozînogluyî bi, Qibris de ameyo tesbîtkerdene. Seba tepiştiş û îadekerdişê Ugurî xebatî dewam kenê.
Alî Îşgoren, o wext Serekdozgerê Sîlîvrî bi û tehqîqatê verênî yê mergê Kozînogluyî de qerarê bêtaqîbîyî dabi. Îşgoren û dozgerê zîndanî Necîp Dogan dima ra rîyê têkilîyanê FETO’yî ra wezîfe ra amebî îxraçkerdene. Hasan Ataman Yildirim zî o wext qoxuş de embazê înan bi.
Tehqîqat reyna dest pêkerd
Kozînoglu 12ê Teşrîna Peyêne ya 2011î de zîndan de nêweş kewtbi û rayîrê nêweşxaneyî de merdbi. O wext qerarê bêtaqîbîyî dîyabi. Wezîrê Edaletî Akin Gurlekî eşkera kerd ke Serekîya Daireyê Cigêrayîşê Sûcanê Kerdoxanê Nêdîyareyan dosya reyna qeyd kerde. Gurlekî vat ke qerarê bêtaqîbîyî yo ke 2012 de dîyabi, bi qerarê 26ê tebaxa 2026î wedarîya û dosya de qerarê nimitkîyî ame girewtene.
Gurlekî da zanayene ke derheqê 11 xebatkaranê zîndanî de kar kerdene ra 10 şikdarî ameyî destbendkerdene, yew zî fîrarîyê FETO’yî yo. Reyna çarçewaya tehqîqatî de derheqê rêzefîlmê "Kurtlar Vadîsî" de zî cigêrayîş ame destpêkerdene.
