Seba azadîya fizîkî ya Rayber Apoyî qerarê çalakîyan

Kordînasyonê Cinîyan ê Ciwanan û Meclîsê Ciwanan ê Partîya Seypêyî û Demokrasî ya Şaran bi endamanê xo yê ke Kurdistan û Tirkîya ra ameyî, eşkerayîya encamî ya perwerdeyî ke 1-4ê temmuze de Amed de û Heyetê Meclîsê Pêroyî (GMK) ke 5ê temmuze de viraşt, eşkera kerd. Eşkerayî de ame îfadekerdene ke verê heme çîyan Prosesê Haştî û Komelê Demokratîk, rojeva sîyasî ya Kurdistan, Tirkîya û dinya ame nirxnayene û seba prosesê ameyoxî planî ameyî viraştene.

Eşkerayî de destnîşan bî ke vengdayîşê Haştî û Komelê Demokratîkî yê Rayber Apoyî yê 27ê Sibate roje bi roje hîna rind yeno fehmkerdene û cewabdayîşo tewr baş ê nê firsendî bi komelêko rêxistinbîyaye mumkîn o. Ame destnîşankerdene ke proses bi kede û însîyatîfê Rayber Apoyî resa qonaxê haştîya pozîtîfe û seba ke no bêro vîyartene, ganî Rayber Apo lezabez bireso azadîya xo ya fizîkîye.

Eşkerayî de ame vatene ke ganî qanûnê kokdarî, yê Komelo Demokratîk û Hemwelatîya Azade bi hewayêko ke rûmetê şarê kurdan pêpar nêkero bêrê vetene, nêke do çareserîye rê ney, do seba şerêko seserrî yo bîn xizmet biko. Destnîşan bî ke ciwanan mîtîngê Azadîye yê 27-28ê Hezîrane yê Wan, Mêrsîn, Amed û Îstanbulî de îradeyêko zelal û qerardar nîşan da ke waştişê ci yo tewr gird azadîya fizîkî ya Rayber Apoyî ya, û seba tesbîtkerdişê statuyê ci ke 43 rojî yo Rayber Apoyî reyde pêdîyayîş nêyeno kerdene, hêzê pêşeng ê têkoşînî ciwan û cinî yê.

Meclîs, derheqê zîhnîyetê nêrî-serdest de ke her roje qetlîyamê cinîyan virazeno û bi nimitişê nînan sey xokiştişî polîtîkayê bêcezayîye rameno, ser o zî qisey kerd; destnîşan kerd ke vera naye xopawitiş bi rêxistinbîyayîşê cinîya ciwane mumkîn o. Meclîsî sewbîna zî derheqê Konferansa Rayberanê NATOyî ya 7-8ê Temmuze ya Ankara de zî qisey kerd, destnîşan kerd ke destbendkerdiş û tepiştişê ke verê na konferanse ameyî kerdene, qebûl nêbenê û qerar da ke planê xo yê ameyoxî goreyê na xete bikerê.

Peynî de, qeraran de: seba ke waştişê azadîya fizîkî ya Rayber Apoyî Tirkîya û Kurdistan de hîna xurt bêro ziwan, çalakî û aktîvîtyeyê cîya-cîyayî bêrê viraştene; seba beşdarîya ciwanan a prosesî, bi taybetî waranê akerdeyan de ciwanan reyde têhetbîyayîşê bi temayanê cîya-cîyayan bêrê kerdene; perwerdeyê merkezî yo ke 1-4ê temmuze de viraşt, bajar û qezayan de zî goreyê şertan bêro viraştene; û 18-19ê temmuze de Ankara de hetê Komîsyonê Têkilîyanê Teberî yê Meclîsê Ciwanan ê DEM Partî ra derheqê rolê ciwanan ê dîplomasîya neteweya demokratîke de komxebatêk bêro viraştene.