Şarê Şengalî: Wendekaranê Abdullah Ocalanî korîdorê merdimîye ma rê akerd
Şarê Şengalî ke serkêşîya Komunanê Şaredarîyanê Şarî yê Şingalî de korîdorê merdimîye ser o ame têhet, bale ante ser o ke o çîyo ke bi hezaran êzîdî xelas kerd, korîdorê merdimîye bî.
Şengal de fermanê 3ê tebaxe 2014î de êzidîyî bi korîdorê merdimîye ke şervananê YPG-YPJ’yî û gerîlayan akerd, jenosîdî ra xelisîyayî. Wexto ke serrgêra fermanî nizdî bena, şarê Şingalî û dezgehê Şingalî na hemle yad kenê.
Emserr zî şarê Şengalî serkêşîya Komunanê Şaredarîyanê Şarî yê Şengalî de xeta "Korîdorê Merdimîye" ya mabênê Şengal û Rojawanî de ame têhet û vindîbîyayeyê xo yad kerdî.
Hemsereka Komunanê Şaredarîyanê Şarî yê Şengalî Xwedêda Îlyasî tîya de eşkerayîyêka çapemenî da û vat ke şar fermanê 3ê Tebaxe de bi jenosîdî reyde rî bi rî mend: "Tîya de binê her dare, her rayîr û her prosesî de tarîxêk est o. Şarê ma 2014î ra nat zehmetîyanê girdan reyde têkoşîn da. Çi heyf ke şarê êzîdî hema zî cehd keno ke birînanê xo bipêşo. Coka ma eşkenê vajê ke fermanê 3ê tebaxe hema zî nêqedîyayo."
Îlyasî ard vîrî ke êzîdîyan fermanî de xîyanet dî û wina dewam kerd: "Ma do o çîyo ke ame şarê ma ser û ê xîyanetî qet xo vîr ra nêkerê. O wext hukmatê Malîkî û Barzanî wezîfe ser o bî, vatêne 'ma êzîdîyan pawenê', la wayîrê şarî nêvejîyayî û ê teslîmê DAIŞ’î kerd. Ma do sereyê nêronê dişmenî ver, ma do xover bidê. Şarê ma bi fikranê Rayber Apoyî ameyî rêxistinkerdene. Tîya de bi seyan tankê Barzanîyan est bîyî, bi tena yew guleyî zî cewab nêda. La wendekaranê Rayberîye ame û no korîdorê merdimîye ma rê akerd. No rayîr bi hezaran kesan rê şahidî kerd. Ma deyndarê wendekaranê Rayberîye û şehîdan ê ke seba ma ganê xo feda kerd."
Eşkerayîye bi şîarê "Şehîd namirin" qedîyaye.
