Şarê Kanîreşî: Ma serekê xo ra bawer ê
Bi wesîleya têhetameyîşanê “Ma şarî reyde qalê aştîye kenê” Hemsereka DBP’î Çîgdem Kiliçgun Uçare û şarê Kanîreşî ameyî têhet. Şarê Kanîreşî vat ke ma serekê xo ra bawer ê, Rayberê Şarê Kurdî Abdullah Ocalanî û embazanê ey rê silamanê xo erşawenê.
Hemsereka Pêroyî ya Partîya Herêmanê Demokratîkan (DBP) Çîgdem Kiliçgun Uçare û temsilkaranê DBP’yî çarçewaya têhetameyîşanê “Ma şarî reyde qalê aştîye kenê” de xebatê xo roja diyîne de qezaya Çewlîgî Kanîreş de da dewamkerdiş. Bernameya ewroyî de Dewa Hacîyan a ke girêdayeyê Kanîreşîya de dest kerd ci û dima ra zî ameyî merkezê Kanîreşî.
Çîgdem Kilicgun Uçare qiseykerdişê xo yê dewa Hacîyan de bale ante serê polîtîkayenê dewlete yê ke vera kurdanî û wina vat: “Heta nika na dewlete vat ‘kurd çin o, zonê kurdî çin o, îtiqadê kurdî çin o.’ Ma sekerd? Ma her ca de vat ke ‘ma est ê. Zonê ma, îtiqadê ma est o, pêrodayîsê ma est o, îta welatê ma yo. Dewlete ma de şer kerd, şer kerd. Dewlete vat ke ‘ma heta nika kurdî înkar kerdî. Ma polîtîka asîmîlasyonî dayo ramitene, la nînan zonê xo canêverda. Estbîyayîşê xo canêverda, nasnameya xo canêverdê.’ Dewlete mecbur mende va ma lazimo ke çîyêko bin bikerê, çîyê de newe bikerê. Coka ma vanê ke ma zêreyê jû demê newî deyê, mîyanê prosesêko neweyî de yê.”
‘Çar parçeyê Kurdîstanî de zî ma bîyê aktor’
Çîgdem Kilicgun Uçare wina va: “Çar parçeyê Kurdîstanî de, teyna şarê nîyê. Ma bîyê kerdox, ma bîyîme aktor. Ma her cade vat ke eke jû dewlete çîyê virazena gerekî raver şarê kurdî, şarê kirmancî bivîno. Ewro Tirkîya de domananê ma, domananê nê welatî bi pêrodayîşê xo, cinîyanê nê welatî pêrodayîş û xoverdayîşê xo, heme mordemanê nê welatî vat ke ‘ma aştîyê bi kedê xo virazenîme, ma azadîya xo bi destê gênîme’. Heta nika ma ra vatêne ke ‘şima çin ê’. Ama ma zanenê ke ewro serê dinya de kes nevano kî ‘şarê kurd çin o’. Ma estbîyayîşê xo, bi destê xo guret.”
Program bi pers û cewaban dewam kerd
Dima qiseykerdişê Çîgdem Kiliçgun Uçare ra hemwelatijan persê xo pers kerdî. Yew welatijî wina pers kerd: “Bawerîya şarî dewlete ra çin a. Çike dişmenêko xedar o. Proses çi aste de yo û sebeno? Embazanê ma hîna zî hayê zindande yê, çira nêvêjînê? Ewil gerê Serek Abdulllah Ocalan vejîyo, dima ra Selehattîn, Fîgen, Leyla û peyra embazê zindanî pêro vejîyê. Rewşa gerîllayan sebena? Seba înan gerê qanûnêko rind vejîyo.”
‘Silamanê ma serekî û embazanê ey rê bibê’
Hemwelatij peynîya qiseykerdişê xo de silamê xo erşawitî Îmraliyî û wina vat: “Şima şinê Îmraliyî yenê. Wexto ke şima şinê silamanê ma serekî û embazanê ey ra bikerê. Ci ra vajê ‘Ey çi kar vajê ma bikerê. Ey sereyê ma yê, çimê ma yê. ravêrêkî înan dayo destpêkerdiş ma heta peynî bawer ê, wa naye herkes rind bizano.”
Nê kombîyayîşî ra dima heyet derbazê merkezê Kanîreşî bî û ûca de zî şarî reyde ameyî têhet û verpersanê, persanê înan da.
Bernameyê heyetê şand seet 19.00 dê dewa Armelî dê dewam bikero.
