Rojhilatê Kurdîstanî de krîzê dormereyî xorinêr beno
Rojhilatê Kurdîstanî de seba şewatanê daristanan çimeya awe û seydkerdişo bêqanûnî krîzê dormereyî xorinêr beno; pisporan seba ciwîyayîşê xozayî û weşîya şarî hişyarîyê ciddîyî dayî.
Rêxistina Heqanê Merdiman Herana, hefteyê viyarteyî de derheqê problemanê dormereyî yê Rojhilatê Kurdîstanî de yew raporo hîra weşanay.
Goreyê datayanê ke rapor de ca genê, ormananê herêmanê ciyayan yê Koyanê Zagrosî de 100 hektar ra zêdêr ca şewatan de zerar dîyo. Rapor de eynî wext de dîya zanayene ke başûrê ormananê Zagrosî de seba vurnayîşê îqlîmî tewirê teyranê seydkaran ê zey Qertelê Zerdî û Şahînî tehlukeyê qedîyayîşî (vînbîyayîşî) reyde rî bi rî yê.
Înan ra pîya, çarçeweya tehlukeyanê vera dormeyî yê herême de, ame vatene ke grûbanê pawitişê dormeyî yê şaristananê Kirmanşan, Selmas û Selasê Bawacanî de xeylê toranê seydkerdişî yê bêqanûnîyan ser û seydkerdoxê qaçaxî destbend kerdê.
Heto bîn ra, goreyê datayanê Îdareyê Awe yê Eyaletê Urmîye, kêmbîyayîşê çimeyanê awe resayo yew sewîyeya krîtîke. No rewş sektorê zîretî de beno sebebê problemanê ciddîyan û seba bîranê ke bêqanûnî ameyî akerdene, 32 deştan de sewîyeya awa binerdî bi temamî ameya war. Tayê herêman de zî xorinîya bîran heta 380 metreyî resaya.
Pisporê dormereyî danê zanayene ke ziwayîye, kêmbîyayîşê varanî, bêplan û bêqanûnî xebitnayîşê çimeyanê awe, plansazîya nêbesa ya rayedaran û îhmalkarîya înan, sebebê serekî yê ke krîzê dormeyî yê Rojhilatê Kurdîstanî xorinêr kenê. Goreyê pisporan nê problemî hem seba ciwîyayîşê xozayî hem zî seba weşîya şarê herême yew tehlukeyo ciddî awan kenê.
